Respublika ərazisində aparılan yenidənqurma işləri “İmişli” REŞ-in balans mənsubiyyətində fəaliyyət göstərən  “Füzuli” EŞ də  də aparılır. Qeyd edək ki,  “Füzuli” EŞ-in enerji təchizatı 45 ədəd 10-6 kV-lik elektrik verilişi xətləri (EVX) balnsda olan və olmayan 539 ədəd 10 (6)/0,4 kV-lik transformator vasitəsilə təmin edilir.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, enerji təchizatında dayanıqlığın  daha da möhkəmləndirilməsi məqsədilə son üç ay  ərzində 110 kV-lik “Böyük Harami”, 35 kV-lik “Mahmudlu”, “Horadiz”və  “Böyük Bəhmənli” yarımstansiyalarının hava elektrik verilişi xətlərində təxminən 5 kilometrə yaxın məsafədə əsaslı və cari təmir işləri aparılıb. Mənbədən aldığımız məlumata görə, müvafiq tədbirlər rayonun Alxanlı, Mahmudlu, Böyük Bəhmənli, Əhmədbəyli, Yağlıvənd, Kəriçbəyli, Babı, Şükürbəyli, Araz Diağarda ,Qazaxlar kəndlərində və Horadiz şəhərində də icra edilmişdir. Qeyd edək ki, burada  0,4 EVX-lər üzrə 6 kilometrdən artıq  məsafədə əsaslı və cari təmir işləri yerinə yetirilib və enerji daşıyıcılar normal vəziyyətdə istifadəyə verilib.

Bununla yanaşı, 10/0,4 kV-lik tranformatorlar da təmir edilmişdir. Belə ki, müəssisədən verilən məlumata əsasən, son üç ay ərzində burada 37 ədəd müxtəlif güclü transformator  təmir edilərək normal iş rejiminə gətirilib.

“İstehlakçıların keyfiyyətli və dayanıqlı elektrik enerjisi ilə təmin olunması, gələcəkdə yarana biləcək problemlərin qarşısının alınması məqsədilə transformator məntəqələrində, elektrik verilişi xətlərində əsaslı və cari təmir işləri yerinə yetirilir. Bu da öz növbəsində sayğac sxemlərinə müdaxilə hallarının qarşısının alınmasında əhəmiyyətli rol oynayır”, – deyən mənbə onu da bildirdi ki, cari ilin aprel ayında müəssisənin xidməti ərazisində keçirilmiş reydlər zamanı 6 istehlakçının sayğac uçot komplektində qüsur aşkar edilərək 84,1 min kilovatsaata yaxın itirilmiş elektrik enerjisinin 5 min manatdan artıq istehlak dəyəri bərpa edilmişdir. Hesabat ayında həmin bu məbləğin 38 faizə yaxın hissəsinin ödənişi təmin edilmişdir.

Onu da qeyd etmək yerinə düşərdi ki, cari ilin 4 ayı ərzində isə burada 24 qayda pozuntusu faktı aşkar olunmuş, tərtib edilmiş aktlar müvafiq qaydada  araşdırılaraq hesabat aparılmış və nəticədə 135,4 min kilovatsaatdan artıq itirilmiş elektrik enerjisinin 8,1 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 59 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Qayda pozuntularının təsnifatına görə, mənbəyə istinadən onu da qeyd etmək yerinə düşərdi ki, müdaxilə olunmuş sayğaclardan keçən enerjinin bir hissəsinin qeydə alınmaması, sayğacdan kənar istifadə halları üstünlük təşkil edir.