İstehlakçıların daha da keyfiyyətli və dayanıqlı elektrik enerjisi ilə təmin olunması, gələcəkdə yarana biləcək problemlərin qarşısının alınması məqsədilə həyata keçirilən yenidənqurma işləri çərçivəsində respublikanın qərb bölgəsinin enerji təchizatının yaxşılaşdırılmasına da xüsusi diqqət yetirilməkdədir.

“Azərenerji” ASC-nin Mətbuat xidmətinə daxil olan məlumata görə, 330 kV-lik "Gəncə" yarımstansiyasının hava açarları müasir tipli eleqaz açarları ilə dəyişdirilib. "Ağstafa" yarımstansiyasının 110 kV-lik hissəsində də analoji tədbirlər reallaşdırılıb. 330 kV-lik hissədə də mühüm işlər görülür. "Zəyəm" və "Alabaşlı" yarımstansiyalarında da yeni və daha güclü transformatorların quraşdırılması ilə yenidənqurma işləri həyata keçirilib.

Qeyd edək ki, artıq şəbəkələr üzrə əsaslı və cari təmir işlərinə start verilib. Hazırda yer sürüşməsi ilə əlaqədar olaraq Şamaxı rayonunun Ərəbqədimli kəndi və Cəngi adlanan ərazinin yaxınlığından keçən sistemtəşkiledici 330 kV-lik  I "Abşeron"  və 500 kV-lik  II "Abşeron" elektrik verilişi xətləri üzrə müəyyən dayaqlarda qəzalı vəziyyət yaranıb və hazırda yeni dayaqlar quraşdırmaqla, xəttin trassasının dəyişdirilməsi istiqamətində işlər davam etdirilir.

Yeri gəlmişkən, bu il havaların çox yağmurlu keçməsi nəzərə alınaraq artıq yüksək gərginlikli xətlərə və dayaqlara növbədənkənar baxışlar keçirilir. Bunların nəticəsi olaraq qüsur aktları tərtib olunur və çatışmazlıqların aradan qaldırılması istiqamətində əməli tədbirlər görülür.

Perspektiv inkişaf sxemi çərçivəsində elektroenergetika sektorunda həyata keçiriləcək infrastruktur layihələri haqqında əldə etdiyimiz məlumatda bildirilir ki, 500 kV-lik "Abşeron" yarımstansiyasında hər biri 133 MVA olmaqla 3 avtotransformatorun, "Hövsan" yarımstansiyasında gücü 200 MVA olan 3-cü transformatorun, "Səngəçal" yarımstansiyasında 125 MVA-lıq transformatorun 200 MVA-lıqla əvəz olunması, "Qəbələ" yarımstansiyasının imkanlarının da xeyli genişləndirilməsi nəzərdə tutulub. Burada 63 MVA gücündə 5-ci transformatorun quraşdırılması, 110 kV-lik açıq paylayıcı quruluşun tikintisi, 110 kV-lik hava xətlərinin yarımstansiyaya birləşdirilməsi reallaşdırılacaq tədbirlər sırasındadır.

Eyni zamanda, 110 kV-lik "Gədəbəy" yarımstansiyası və "Zəyəm" paylayıcı məntəqəsinin, eləcə də onları birləşdirəcək ikidövrəli hava xəttinin tikintisi də reallaşdırılması nəzərdə tutulan əhəmiyyətli işlərdəndir.