Dövlət Başçısının diqqət və qayğısı sayəsində  ən müasir texnologiyaların tətbiqi ilə tikilərək istifadəyə verilmiş, respublikamızın şimal bölgəsinin elektrik enerjisinə olan tələbatının daha dolğun şəkildə təmin olunmasında “Xaçmaz Elektrik Stansiyası”nın (ES) ardından "Şahdağ" ES-in tikilərək istismara verilməsi böyük əhəmiyyət kəsb etmişdir. Həmçinin, bu, bölgənin sosial-iqtisadi inkişafı baxımından da mühüm rola malikdir.

Sözügedən generasiya gücü eyni zamanda bölgədə mövcud olan turizm potensialından daha səmərəli istifadə edilməsi və xüsusən xarici turistlərin bölgəyə cəlb olunması üçün münbit infrastrukturun yaradılmasına yönəlib. Bu isə energetiklərin ölkənin hərtərəfli inkişafına verdikləri əvəzsiz töhfə kimi dəyərləndirilməlidir.

Sözügedən elektrik stansiyasından “Azərenerji” ASC-nin Mətbuat xidmətinə daxil olan məlumata görə, elektrik stansiyasında porşen tipli mühərriklərdən ibarət olan aqreqatlara nəzərdə tutulmuş bütün texniki xidmətlər qrafikə uyğun vaxtında göstərilmiş və ötən illərdə olduğu kimi cari ilin I rübündə də elektrik enerjisi istehsalında problem yaranmamışdır.

Qeyd edək ki,  cari ilin mart ayı üçün müəssisədə elektrik enerjisi istehsalı 29 milyon kilovatsaat proqnozlaşdırıldığı halda, faktiki istehsal 29,2 milyon kilovatsaatdan çox olmuşdur. Yeri gəlmişkən, cari ilin I rübü ərzində isə 94,6  milyon kilovatsaata yaxın elektrik enerjisi istehsal edilmişdir ki, bu da proqnozlaşdırıldığından 1,1 milyon kilovatsaat çoxdur.

Onu da bildirək ki, avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsinin və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində sözügedən dövrlərdə elektrik enerji istehsalı üzrə digər texniki göstəricilərdə də proqnoz göstəricilərlə müqayisədə müsbət nailiyyətlər əldə edilmişdir.

Mənbədən əldə etdiyimiz digər bir məlumatda o da qeyd edilir ki, generatorların  hamısı normal iş rejimində fəaliyyət göstərir. Hazırda generator aqreqatlarında reqlamentə uyğun nəzərdə tutulmuş texniki baxış  işləri həyata keçirilir. Ümumiyyətlə, stansiya dispetçer qrafikinə uyğun fəaliyyət göstərir.

Sonda onu da qeyd edək ki, digər enerji obyektlərində olduğu kimi, burada da yanğın təhlükəsi olan bütün yerlər diqqətdə saxlanılır və onlar təlimata uyğun olaraq yanğına qarşı ləvazimatlarla tamamilə təmin olunmuşdur.

Xatırladaq ki, hər birinin gücü 8,7 MVt olan 12 ədəd porşen tipli aqreqatdan ibarət olan bu elektrik stansiyasında istehsal olunan elektrik enerjisinin enerjisistemə ötürülməsi üçün 110 kilovoltluq II “Quba” hava xəttinin stansiyaya giriş-çıxışının  təmin edilməsi məqsədilə 2 kilometr uzunluğunda yeni xətt çəkilmişdir. Müasir enerji obyekti “Şahdağ” Qış-Yay Turizm Kompleksinin elektrik enerjisi təchizatını təmin edəcəkdir.