Ölkəmizin enerji sistemində həyata keçirilən məqsədyönlü tədbirlər, yeni texnologiyaların tətbiqi ilə aparılan quruculuq işləri  istehlakçıların dayanıqlı  və keyfiyyətli elektrik enerjisi ilə təminatını daha da yaxşılaşdırmağa imkan verir. Texniki-iqtisadi göstəricilərin səviyyəsinin yüksəldilməsini, o cümlədən  elektrik enerjisinin dayanıqlı ötürülməsini təmin etmək üçün nəzərdə tutulan texniki tədbirlər cari ildə də davam etdirilmişdir.

“Xaçmaz Regional Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumatda son üç ay ərzində REŞ-in balans mənsubiyyətinə aid olan “Xaçmaz” EŞ və “Quba” EŞ-də həyata keçirilən təmir-bərpa işləri barədə qeyd edilir.

Belə ki, göstərilən müddət ərzində Xaçmaz rayonunun enerji təminatında başılıca rol oynayan eyniadlı elektrik şəbəkəsinin 10-0,4 kV-lik paylayıcı şəbəkələrində bir sıra əhəmiyyətli yenidənqurma işləri aparılıb. Qeyd edək ki,  10 kV-lik “Nizova”, I “Şəhər”, “II Şəhər”, “Konserv kombinat”, “Yergüc”, “RTS”, “Əhmədoba”, “Çarxı”, “Pivə zavod” və “Gəncəli” hava elektrik verilişi xətlərində təxminən 23 km məsafədə aparılan təmir işləri zamanı 10 km-dən artıq naqillər yeni AS-50 markalı naqillərlə əvəz edilmiş, 20-ə yaxın dayaqlar təmir edilmiş, 200-dən artıq isolyatorlar yeniləri ilə əvəz edilmişdir. Müvafiq təmir-bərpa işləri Xaçmaz şəhəri , Üçgün, Qaraçay, Mollabürhan, Hacı İsa oba və Qalağan kəndlərinin 0,4 kV-lik elektrik verilişi xətlərində də yerinə yetirilmiş, enerji daşıyıcılar normal iş rejiminə gətirilmişdir. O cümlədən, 5 ədəd dayaq yenisi ilə əvəzlənmiş, 10-dan çoxu isə təmir edilmişdir.

Bundan əlavə, EŞ üzrə 40-a yaxın müxtəlif güclü komplekt transformator yarımstansiyasında (KTM) 50-dən artıq ayırıcı təmir edilmiş, bir neçə KTM-də transformatorlara yağ əlavə edilmişdir. Mənbədən onu da bildirdilər ki, texnoloji itkilərin azaldılması məqsədilə ötən ilin tədbirlər planına uyğun olaraq, Xaçmaz şəhərində I “Şəhər” hava elektrik verilişi xəttindən qidalanan 630 kVA-lıq transformator yükə uyğun yenisi ilə əvəzlənmişdir və il ərzində gözlənilən iqtisadi səmərəsi 18576 kV/saatdır. Qeyd edək ki, təmir-bərpa işləri mütəmadi olaraq həyata keçirilir, EVX-lərə mütəxəssislər tərəfindən baxış keçirilir və aşkar olunan hər hansı qəza hallarının qarşısı vaxtında aradan qaldırılır.