“Zaqatala Elektrik Şəbəkəsi”ndə elektrik təsərrüfatının fəaliyyətini sağlamlaşdırmaq, istehlakçıları daha da keyfiyyətli elektrik enerjisi ilə təmin etmək məqsədilə həyata keçirilən işlər öz bəhrəsini verməkdədir. Şəbəkədən bu barədə “Azərenerji” ASC-nin Mətbuat xidmətinə məlumat verərkən bildirdilər ki, elektrik enerjisi ilə təchizat sahəsində vəziyyətin qənaətbəxş olması rayonun elektrik təsərrüfatında görülmüş əsaslı və cari təmir işləri ilə də bağlıdır.

Qeyd edək ki, son vaxtlar bu istiqamətdə xeyli iş görülüb, nəticədə  enerji təchizatında problemlər aradan qaldırılıb. Elektrik enerjisi ilə təminatda dayanıqlığın təmin edilməsi məqsədi ilə yarımstansiyalarda əsaslı və cari təmir işləri aparılır. Belə ki, bu ilin yanvar-fevral ayları ərzində 10 kV-lik elektrik xətlərində bir neçə ayırıcı dəyişdirilib, transformator məntəqələrində 33 ədəd 0,4 kV-lik ayırıcı quraşdırılıb, 18 ədəd transformator əsaslı və cari təmir edilib. Həmçinin 10 kV-lik xətlərdə 8 ədəd dayaq, 0,4 kV-lik xətlərdə isə 107 dayaq yenisi ilə əvəz edilib. Hava xətlərinin ətrafı yaşıl kütlələrdən təmizlənib. Rayonun enerji təsərrüfatının daha da yaxşılaşdırılması istiqamətində həyata keçirilən tədbirlər bu gün də uğurla davam etdirilir.

Onu da qeyd edək ki, elektrik enerjisindən istifadə qaydalarının pozulması hallarının aşkarlanması üçün mütəmadi reydlər keçirilir. Cari ilin yanvar-fevral ayları ərzində reydlər zamanı 123 istehlakçının sayğac-uçot komplektində qüsur aşkar edilərək 210 min kilovat-saatdan artıq itirilmiş elektrik enerjisinin istehlak dəyəri bərpa edilib. Müəyyən edilmiş məbləğdən təqribən 60 faizə yaxını ödənilib. Həyata keçirilən müvafiq tədbirlər nəticəsində həmin məbləğin qalan hissəsinin ödənilməsi istiqamətində müvafiq tədbirlər görülür. Görülən tədbirlər nəticəsində getdikcə elektrik enerjisindən qeyri-qanuni istifadə edənlərin sayı azalır, əhali istehlak mədəniyyətinə yiyələnir.

Yeri gəlmişkən, bu il qış aylarının çox sərt keçməsinə baxmayaraq, rayonda enerji qıtlığı müşahidə olunmayıb. Qış boyu istehlakçılar fasiləsiz və keyfiyyətli elektrik enerjisi ilə təmin olunublar. Bütün bunlar elektrik təsərrüfatında həyata keçirilən müvafiq tədbirlərlə əlaqədardır.

Sonda onu da qeyd edək ki, şəbəkədə əməyin mühafizəsi məsələləri də diqqət mərkəzindədir. İşçilərin peşəkarlıq səviyyələrinin yüksəldilməsinə daim diqqət yetirilir. Bunun üçün mütəmadi olaraq qəza məşqləri, müxtəlif treninqlər keçirilir. Əməyin mühafizəsi və texniki təhlükəsizlik məsələləri də arzuolunan səviyyədədir. İşçilər texniki təhlükəsizlik və əməyin mühafizəsi ilə bağlı mütəmadi olaraq təlimatlandırılırlar.