Respublikamızın enerji təchizatı sistemində  yenidənqurma işlərinin geniş vüsət alması istehlakçıların elektrik enerjisi ilə dayanıqlı və keyfiyyətli təminatını daha da yaxşılaşdırıb.

“Azərenerji” ASC-nin Elektrik Enerjisinin Ötürülməsi İdarəsindən Səhmdar Cəmiyyətin Mətbuat xidmətinə daxil olan məlumatda belə qeyd edilir və o da bildirilir ki, bunu «Mingəçevir Regional Elektrik Şəbəkəsi»nin ba­lans mənsubiyyətində olan “Zər­dab Elektrik Şəbə­kəsi”nin timsalında da görmək olar. Məhz xətt və avadanlıqlara, transformator məntəqələrinə və yarımstansiyalara lazımi texniki  qulluğun nəticəsidir ki, 2014-cü ilin də yekunu şəbəkə kollektivi üçün uğurlu olub.

Mənbədən aldığımız məlumata görə, 35/10 kV-lik «Zərdab» yarımstansiyasından çıxan «Zər­dab-Ucar», «Zərdab-Əlvənd» ha­va xətlərinin 35 kV-lik yağ açarları və 35/10 kV-lik 6,3 MVA gücündə olan 1 və 2 saylı transformatorların 10 kV-lik giriş yağ açarları əsaslı təmirdən çıxarılıb ki, bununla da onların dayanıqlı işi təmin edilib. Həmçinin 2 saylı transformator kompleksində də zəruri texniki qulluq həyata keçirilib.  Lüzumsuz açılmaların qarşısının alınması məqsədilə 35/10 kV-lik «Zərdab» yarımstansiyasında 35 və 10 kV-lik yağ açarlarının mühafizə dövrləri yoxlanılıb və sazlama işləri aparılıb. 3 saylı «Şəhər», «Mərkəzi Ra­yon Xəstəxanası», «Zərdab-Əlvənd» hava xətlərinin, İsaq­bağı kəndi ərazisindəki 0,4 kV-lik hava xəttinin trassası yaşıl kütlədən təmizlənib və boşalmış naqillər çəkilib bərkidilib. Transformatorların yenisi ilə əvəzlənməsi prosesi də rayon energetiklərinin əsas vəzifələrindən biri olub. Rayonun Yediyarlı, Təzəkənd, Bıçaqçı,Gəlmə kəndlərindəki müxtəlif gücdə olan  transformatorlar yenisi ilə əvəzlənib. Güclü küləklər və leysan yağışları nəticəsində müxtəlif xətlərin zədələnmiş dayaqları yeniləri ilə əvəz olunub.

35/10 kV-lik «Əlvənd» yarımstansiyasında 4 MVA gücündə olan transformator cari və bütün yağ açarları əsaslı təmir edilib, avadanlıqlara yağ əlavə olunub ki, bu da yarımstansiyanın dayanıqlı işinə zəmin yaradıb. Dəliquşçu kəndi ərazisində 10 və 0,4 kV-lik hava xətlərində təmir-bərpa işləri aparılıb.