Rayon elektrik şəbəkələrinin təmirçilər briqadaları ötən ildə həyata keçirdikləri əsaslı və cari təmirləri, qurğu və avadanlıqlarda apardıqları yenidənqurma işləri istehlakçıları daha da dayanıqlı və keyfiy­yətli elektrik enerjisi ilə təmin etməyə imkan verir. Qış mövsümünü qəzasız və yüksək xidmətlə başa vurmaq üçün görülən işlər davam etdirilir.

“Azərenerji” ASC-nin Mətbuat xidmətinə daxil olan məlumata görə, “Tərtər Elektrik Şəbəkəsi”nin kollektivi ötən ilin dekabr ayında xidməti ərazilərdə elektrik təsər­rüfatına qulluğu davam etdiriblər. Elektrik veriliş xidmətlərinin dayanıqlığını artıqmaq üçün onlar 6-10 kV-lik hissəsində 7,2 km uzunluğunda, 0,4 kV-lik hissəsində isə 4,3 km uzunluğunda əsaslı və cari təmir işləri aparıblar. 17 ədəd 0,4 kV-lik yeni ayırıcı quraşdırıb istifadəyə verib, 2 ədəd yeni dayaq basdırıblar. Bundan əlavə, yeni mənzil sahiblərinin ünvanına 30-a yaxın birfazlı sayğac quraşdırıb, 40-a yaxın sayğacı isə yenisi ilə əvəz ediblər.

«Gəncə REŞ» MMC-nin struktur bölməsi olan “Şəmkir Elektrik Şəbəkəsi”nin kollektivi dekabr ayında müəyyən təmir işlərini həyata keçirib. Rayon mərkəzində və kəndlərdəki 6-10 kV-lik elektrik veriliş xətlərində 2,2 km-ə yaxın, 0,4 kV-lik xətlərdə isə 1,8 km-dən artıq cari və əsaslı təmir işləri görülüb. Şəmkirli energetiklər yarımstansiyalardakı transformatorları təftiş etdikdən sonra zərurət yaranan transformatorlara yağ əlavə ediblər. Bununla yanaşı AC-50 markalı 4 min metr naqil xətlərin müəyyən hissələri dəyişdirilərkən istifadə olunub. Onlar həmçinin ay ərzində digər xətt armaturlarını da dəyişdiriblər.

“Qazax Elektrik Şəbəkəsi”nin kollektivi payız-qış mövsümü üçün nəzərdə tutulmuş tədbirləri bü­tövlükdə yerinə yetirib. Kollektivin üzvləri həmçinin xətt və avadan­lıq­ların texniki vəziyyətinin yaxşılaşdırılması, da­yanıqlığın yüksəldilməsi istiqamətində də müvafiq işləri həyata keçiriblər. Dekabr ayında isə 6-10 və 0,4 kV-lik elektrik veriliş xətlərində əsaslı və cari təmirlərini davam etdiriblər. Onlar 8 ədəd transformatorun fəaliyyətini bərpa ediblər.