Ölkə enerjisistemində ənənəvi xarakter daşıyan  yenidənqurma və təmir-bərpa işləri cari ildə də geniş vüsət almışdır. Belə ki, nəinki şəhərətrafı zonalarda, həmçinin ölkənin bütün  rayon və kəndlərində olan elektrik enerjisi istifadəçilərinin enerji tələbatının dayanıqlığının daha da möhkəmləndirilməsi  istiqamətində növbəti yenidənqurma işləri həyata keçirilir. Belə ünvanlardan biri də İmişli rayon mərkəzidir.

“Azərenerji” ASC-nin Mətbuat xidməti bildirir ki, İmişli rayon mərkəzində paylayıcı elektrik şəbəkəsi yenidən qurulmuşdur. Yenidənqurma işləri zamanı 24,6 km uzunluğunda 10 kV-lik xətlər yenilənmiş, fiziki köhnəlmiş 0,4 kV-luq elektrik şəbəkələrinin yenidən qurulması, elektrik şəbəkəsinin istismarını asandlaşdırılması və elektrik şəbəkəsində itkilərin azaldılması məqsədi ilə 240 kilometrdən artıq 0,4 kV-luq hava xətləri özünüdaşıyan izolyasiyalı naqillər ilə (SİP kabellərlə) əvəz olunmuşdur. Eyni zamanda 4930-dan artıq 10 və 0,4 KV-lik xətlərin dayaqları da yenisi ilə əvəz edilmişdir.

O da qeyd edilməlidir ki, elektrik enerjisinin keyfiyyətinin daha da yaxşılaşdırılması, texniki itkilərin azaldılması məqsədilə yeni güc mərkəzləri yaradılmış və müxtəlif gücdə 30-dan artıq transformatorda dəyişdirilmişdir.

Yeri gəlmişkən, şəbəkələrin bərpası və yenidən qurulmasından başqa, elektrik enerjisinin uçotunun nizama salınması proqramına uyğun olaraq ilkin ödənişli kartlar vasitəsilə elektrik enerjisindən istifadəyə görə müasir ödəmə sistemi də tətbiq edilmiş, o cümlədən 7800-dən çox smartkart tipli sayğac quraşdırılmışdır.

Onu da qeyd etmək yerinə düşərdi ki, həyata keçirilmiş məqsədyönlü tədbirlər nəticəsində istehlakçıların elektrik enerjisi ilə təminatında  dayanıqlıq və keyfiyyət yüksəlmiş, şəbəkələrdə ifrat yüklənmələr aradan qaldırılmışdır. İstehlakçılar arasında aparılan təbliğat işləri sayəsində elektrik enerjisindən təyinatı üzrə  istifadəyə daha çox üstünlük vermələri və israfçılıqla  istifadənin aradan qaldırılması istehlak edilmiş elektrik enerjisinin dəyərinin ödənişində dinamik artımın əldə edilməsinə səbəb olmuşdur. Bu da ümumilikdə rayonda enerjisistemin dayanıqlığının daha da möhkəmləndirilməsi istiqamətində müvafiq layihələrin həyata keçirilməsinə müəyyən qədər kömək edəcəkdir.