Ölkəmizdə elektrik enerjisinin əsas  istehsalçısı olan «Azər­baycan İES» MMC-nin kollektivi 2013-cü ili də uğurla başa vurub. Hesabat dövründə enerji blokları və avadanlıqların texniki-istismar səviyyəsinin yüksəldilməsi istiqamətində xeyli iş görülüb.

Stansiyanın texniki-iqtisadi gös­təricilərinin yaxşılaşdırılması, yanacaq və enerji resurslarına qənaət olunması və stansiya avadanlıqlarının payız-qış möv­sümünə hazırlığı ilə, ümumilikdə, 308 bənddən ibarət kompleks tədbirlər planı tam həcmdə yerinə yetirilib. Bununla yanaşı, texniki tələblərə uyğun olaraq aparılmış profilaktiki yoxlama və sazlama-sınaq işləri nəticəsində stansiyada enerji blokları və avadanlıqların dayanıqlı və qənaətli iş rejimləri təmin edilib. Dispetçer yük qrafikinə əməl olunmaqla enerji istehsalı üzrə verilən  tapşırıqlar artıqlamasilə yerinə yetirilib. Əməliyyat heyəti tərəfindən avadanlıqların zədələnməsinə və sıradan çıxmasına gətirib çıxara biləcək qəza və imtina hallarına yol verilməyib.

Sözügedən müəssisədən “Azərenerji”ASC-nin Mətbuat xidmətinə daxil olan məlumata görə, 2013-cü ildə enerji istehsalı üzrə verilən proqnoza tam əməl edilib və 7 milyard 633,2 milyon kilovat-saatdan artıq elektrik enerjisi istehsal olunub. O cümldən, ötən ilin dekabr ayında isə 719,9 milyon kilovatsaatdan artıq elektrik enerjisi istehsal olunub.  İl ərzində enerji bloklarında növbədənkənar açılma olmayıb.

Qeyd edək ki, 2013-cü ildə enerji blokları və avadanlıqların istismarı ilə yanaşı, avadanlıq, bina və qurğularda planlı təmir və profilaktik yoxlama işləriaparılaraq, ətraf mühitin mühafizəsi və yanğın təhlükəsizliyi tədbirləri həyata keçirilib. Belə ki, 2013-cü ildə yanğın təhlükəsizliyinin təmin olunması məqsədilə stansiyada yanğın-texniki komissiyası və könüllü yanğın dəstələri yaradılıb. Stansiyadaxili su xətləri və nasosxana, həmçinin qurğu və avadanlıqların avtomatik yanğınsöndürmə sistemləri təftiş və təmir olunaraq saz vəziyyətə gətirilib. Həmçinin is­tehsalatın bütün sex və sahələrində əməliyyat heyəti ilə yanğına qarşı əks-qəza məşqləri keçirilib və stansiya ərazisi mövsümi ot bitkilərindən təmizlənib.