"Azərenerji" ASC-nin tərkibinə daxil olan elektrik şəbəkələrində istehlakçıların elektrik enerjisi təchizatının yaxşılaşdırılması ilə bağlı ardıcıl və məqsədyönlü tədbirlər davam etməkdədir. Bu baxımdan, Salyan rayonunun elektrik enerjisi ilə təchizatı sahəsində də vəziyyət qənaətbəxşdir. “Salyan” EŞ-dən “Azərenerji” ASC-nin Mətbuat xidmətinə daxil olan məlumata görə, müəssisənin xidməti ərazisində ötən ilin dekabr ayında 28,4 milyon kilovatsaata yaxın elektrik enerjisi istehlak edilmişdir ki, onun da 11,1 milyon kilovatsaata yaxını daimi əhali istehlakçılar qrupuna aiddir. 2012-ci ilin eyni dövrü ilə müqayisədə ümümi istehlak 7,2 milyon kilovatsaatdan çox, daimi əhali istehlakçılar qrupunda isə istehlak 3,9 milyon kilovatsaata yaxın artmışdır. Eyni zamanda ümumi ödəniş 2012-ci ilin eyni dövründəki göstərici ilə müqayisədə mütləq 7 faizdən çox artmışdır. Daimi əhali istehlakçılar qrupunda isə bu göstərici 2 faizə yaxın olmuşdur. Qeyd edək ki, 2013-cü il ərzində isə müəssisənin xidməti ərazisində ümumilikdə 290,6 milyon kilovatsaatdan çox elektrik enerjisi istehlak edilmişdir ki, bu da 2012-ci illə müqayisədə 21 milyon kilovatsaata yaxın çoxdur. O cümlədən, daimi əhali istehlakçılar qrupu üzrə isə bu göstəricilər müvafiq olaraq 84,8 milyon kilovatsaata və 4,2 milyon kilovatsaata yaxın olmuşdur. “İstehlakçılara verilən elektrik enerjisinin haqqının ödənilməsi sahəsində əhalinin ödənişə cəlb olunması qarşıda duran əsas vəzifələrdəndir”, – deyən mənbə onu da bildirdi ki, 2012-ci illə müqayisədə həm ümumi ödəniş, həm də  daimi əhali istehlakçılar qrupunda ödəniş mütləq 7 faizdən çox  olmuşdur.

Elektrik enerjisi ilə təchizat sahəsində vəziyyətin qənaətbəxş olması rayonun enerji təsərrüfatında görülmüş əsaslı və cari təmir işləri ilə də bağlıdır. Belə ki, burada son üç ayı ərzində 130-dan artıq TM-də müxtəlif təyinatlı təmir işləri həyata keçirilmiş, ümumi gücü 1,4 MVA-ya yaxın olan 8 transformator isə əsaslı təmir olunaraq təkrar şəbəkəyə qoşulmuşdur. Eyni zamanda bir kilometr uzunluğunda 6 kV-lik EVX çəkilmişdir. Bütün bunlarla yanaşı 10, 6 və 0,4 kV-lik EVX-lərin 22,1 kilometrə yaxın hissəsində də əsaslı və cari təmir işləri həyata keçirilmişdir.

Mənbədən əldə edilən digər bir məlumata görə, müəssisənin xidməti ərazisində ötən il ərzində keçirilmiş reydlər zamanı 1040-dan artıq istehlakçının sayğac uçot komplektində qüsur aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 11 milyon 547,5 min kilovatsaatdan artıq itirilmiş elektrik enerjisinin 692,9 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində hesabat dövründə həmin bu məbləğin 81 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

O cümlədən, 2013-cü ilin dekabr ayında 90-dan artıq qayda pozuntusu fakt aşkar olunmuşdur. Nəticədə 609,2 min  kilovatsaatdan artıq itirilmiş elektrik enerjisinin 36,6 min manata yaxın istehlak dəyəri bərpa edilmişdir.

Yeri gəlmişkən, digər müəssisələrdə olduğu kimi burada da yanğın təhlükəsizliyi və əməyin mühafizəsi məsələləri diqqət mərkəzindədir. İşçilərin peşəkarlıq səviyyələrinin yüksəldilməsinə daim diqqət yetirilir. Bunun üçün mütəmadi olaraq qəza məşqləri, müxtəlif treninqlər keçirilir. Əməyin mühafizəsi və texniki təhlükəsizlik məsələləri də yaxşı səviyyədədir. İşçilər bu istiqamətdə mütəmadi olaraq təlimatlandırılırlar.