“Şirvan Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumatda bidirilir ki, istismar işləri nəzərdə tutulan qrafik üzrə aparılır. Zərurət yaranan ərazilərdə dayaqlar daha keyfiyyətliləri ilə əvəz olunur, məftillər dəyişdirilir. Bundan başqa, daha çox yüklənən transformator məntəqələrinin yükü azaldılır, həmin istehlakçılar digər TM-lərə qoşulur. Bu da itkilərin azalması və dayanıqlığın yaxşılaşdırılması baxımından müsbət təsirə malikdir. Ötən ilin IV rübü ərzində görülmüş işlər barəsində verilən məlumatda o da qeyd edilir ki, Şirvan şəhərində yenidənqurma tədbirləri ilə əlaqədar olaraq smartkart tipli sayğacların quraşdırılması məqsədi ilə sayğacların giriş xəttinə 3,2 kilometrdən artıq koaksial kabel çəkilmiş, 400 metrdən artıq 6 və 0,4 kV-lik EVX-də əsaslı təmir işləri aparılmış, 10-dan artıq TM-də isə müxtəlif təyinatlı təmir işləri həyata keçirilmişdir. Bütün bunlarla yanaşı üç transformator da əsaslı təmir edilərək istifadəyə verilmişdir. Ümumilikdə isə sözügedən təsərrüfatın balans mənsubiyyətinə aid oaln EVX, yarımstansiya və TM-lərdə mövsümə hazırlıq çərçivəsində bütün lazımi tədbirlər icra olunur.

Qeyd edək ki, müəssisə üzrə ötən il ərzində ümumilikdə  337,1 milyon kilovatsaata yaxın elektrik enerjisi istehlak olunmuşdur ki, bu da 2012-ci ildəki istehlakla müqayisədə 7 milyon kilovatsaat azdır. Ödəniş isə 2012-ci ildəki göstərici ilə müqayisədə mütləq 22 faizdən çox artmışdır. O cümlədən, daimi əhali qrupunda isə istehlak 2012-ci ilin eyni dövrü ilə müqayisədə 1,7 milyon kilovatsaatdan çox azalaraq 44,4 milyon kilovatsaatdan artıq olmuşdur. Onu da qeyd edək ki,  2013-cü ilin dekabr ayında müəssisə üzrə 32,7 milyon kilovatsaata yaxın elektrik enerjisi istehlak edilmişdir ki, bu da 2012-ci ilin eyni dövründəki istehlakdan 2,3 milyon kilovatsaat çoxdur. Ödənişdə mütləq artım isə 3 faizə yaxın olmuşdur. O cümlədən, daimi əhali qrupu üzrə bu göstəricilər müvafiq olaraq 5,9 milyon kilovatsaata yaxın, 122 min kilovatsaata yaxın və 8 faizdən çox olmuşdur.

Mənbədən onu da bildirdilər ki, şəbəkənin istismar səviyyəsinin yaxşılaşdırılması, kabel xətlərinin çəkilməsi, vaxtaşırı reydlərin keçirilməsi və digər qabaqlayıcı tədbirlərin görülməsinə baxmayaraq, elektrik enerjisindən qeyri-qanuni istifadə halları var və ona qarşı sərt tədbirlər görülür. Belə ki, 2013-cü il ərzində müəssisənin xidməti ərazisində keçirilmiş reydlər zamanı 57 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 2 milyon 419,3 min  kilovatsaatdan artıq itirilmiş elektrik enerjisinin 145,2 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində hesabat dövründə həmin bu məbləğin 31 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir. O cümlədən, ötən ilin dekabr ayında isə 9 qayda pozuntusu faktı aşkar olunmuşdur. Nəticədə 104,1 min kilovatsaata yaxın itirilmiş elektrik enerjisinin 6 min manatdan cox istehlak dəyəri bərpa edilmişdir.