İstehlakçıların keyfiyyətli və dayanıqlı elektrik enerjisi ilə təmin edilməsi istiqamətində ölkə ərazisində fəaliyyət göstərən enerji təsərrüfatlarında ənənəvi təmir-bərpa işləri yerinə yetirilir. “Azərenerji” ASC-nin Mətbuat xidmətinə “Xırdalan Elektrik Şəbəkəsi”ndən (EŞ) daxil olan məlumata görə, müəssisənin xidməti ərazisində ötən ilin son üç ayında mövsümə hazırlıq məqsədilə bir sıra təmir işləri yerinə yetirilmişdir. Belə ki, müəssisənin xidmət göstərdiyi Masazır, Hökməli, Güzdək, Müşfiq, Xırdalan və digər yaşayış məntəqələrində 10, 6 və 0,4 kV-lik xətlərdə müxtəlif təyinatlı təmir işləri uğurla həyata keçirilmişdir. O cümlədən, 4 kilometrə yaxın SİP kabel xətti və 9,6 km-dən artıq naqil yenilənmiş, 7 dayaq dəyişdirilmişdir. Eyni zamanda sayğac uçot komplektinə nəzarətin daha da gücləndirilməsi məqəsdilə həyata keçirilən yenidənqurma işləri zamanı 12,9 km-ə yaxın SİP kabel xətti çəkilmiş və 760 sayğac quraşdırılmışdır.

Qeyd edək ki, sözügedən dövrdə 20-dən artıq TM və KTM-də müxtəlif təyinatlı təmir işləri həyata keçirilmişdir. Eyni zamanda 150 saylı TM-də yükün bölüşdürülməsi məqsədilə gücü 250 KVA olan bir TM və gücü 100 KVA olan bir KTM-də istismara verilmişdir. Bütün bunlarla yanaşı müəssisənin xidməti ərazisində dörd transformator isə daha güşlüsü ilə əvəzlənmişdir. Texnoloji itkiləri azaltmaq və transformatorlardan səmərəli istifadə etmək məqsədilə transformatorların gücləri ilə yüklərinin uyğunluğuna baxış keçirilmiş və müvafiq tədbirlər görülmüşdür.

Yeri gəlmişkən, müəssisənin xidməti ərazisində enerji təchizatının daha da dayanıqlı təmin edilməsi istiqamətində görülən işlər davam etdirilir. Hazırki iqlim şəraitini nəzərə alaraq, yanğın təhlükəsizliyinin təmin edilməsi məqsədilə TM və KTM-lərin ərazisi quru otlardan təmizlənmiş, yanğınsöndürmə postları yoxlanılmış və komplektləşdirilmişdir. Eyni zamanda yağ tutumlu avadanlıqların alt hissəsindəki yağ çınqıllar yeni təmiz çınqıllarla əvəz edilmişdir.

Mənbədən əldə edilən digər bir məlumata görə, ötən ilin dekabr ayında müəssisənin xidməti ərazisində keçirilmiş reydlər zamanı 280-dən artıq istehlakçının (bundan 272-si məişət abonenti (əhali) istehlakçılar qrupuna aiddir) elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 613,3 min  kilovatsaatdan artıq (bundan 572 min kilovatsaatdan çoxu məişət abonenti (əhali) istehlakçılar qrupuna aiddir) itirilmiş elektrik enerjisinin 36,8 min manata yaxın istehlak dəyəri bərpa edilmişdir. Onu da qeyd edək ki, 2013-cü il ərzində isə 2520-dən artıq qayda pozuntusu aktı tərtib olunmuşdur ki, bunun da 2382-si məişət abonenti (əhali) istehlakçılar qrupuna aiddir. Müvafiq qaydada hesabat aparılaraq 6 milyon 594,1 min kilovatsaata yaxın (bundan 5 milyon 293,8 min kilovatsaata yaxını məişət abonenti (əhali) istehlakçılar qrupuna aiddir) itirilmiş elektrik enerjisinin 395,6 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində hesabat dövründə həmin bu məbləğin 63 faizdən çox hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Məlumatda o da bildirilir ki, həyata keçirilən tədbirlər nəticəsində müəssisənin digər texniki iqtisadi göstəricilərində də müsət dinamika müşahidə edilmişdir. Belə ki, müəssisə üzrə ötən ilin dekabr ayındakı ümumi istehlak 2012-ci ilin eyni dövründəki  istehlak ilə müqayisədə 12,2 milyon kilovatsaata yaxın artaraq 42,5 milyon kilovatsaatdan artıq olmuşdur. Ödəniş isə 2012-ci ilin eyni dövründəki göstərici ilə müqayisədə mütləq 13 faizdən çox artmışdır. O cümlədən, daimi əhali istehlakçı qrupunda isə 19,8 milyon kilovatsaatdan artıq elektrik enerjisi istehlak edilmişdir ki, bu da 2012-ci ilin eyni dövründəki istehlakdan 8,5 milyon kilovatsaat çoxdur. Hesabat dövründə ödəniş isə 2012-ci ilin eyni dövrü ilə müqayisədə mütləq 5 faizə yaxın artmışdır. Onu da qeyd etmək yerinə düşərdi ki, 2013-cü il ərzində isə müəssisə üzrə ümumilikdə 377,4 milyon kilovatsaata yaxın elektrik enerjisi istehlak edilmişdir. Nəticədə 2012-ci ilin müvafiq dövründəki göstərici ilə müqayisədə istehklak 47,2 milyon kilovatsaatdan, ödəniş isə mütləq 14 faizdən çox artmışdır. O cümlədən, daimi əhali istehlakçı qrupunda isə bu göstəricilər müvafiq olaraq 146,1 milyon kilovatsaatdan artıq, 19,6 milyon kilovatsaata və 6 faizə yaxın olmuşdur.