Yola saldığımız 2013-cü il də təkçə ölkə energetikləri deyil, bütün respublika üçün əlamətdar hadisələrlə yada qalmışdır. Dövlət proqramlarında elektrik enerjisi sistemində də nəzərdə tutulmuş layihələr uğurla həyata keçirilmişdir.

Qeyd etmək yerinə düşərdi ki, ölkə Prezidenti İlham Əliyevin müəllifi olduğu Dövlət Proqramına uyğun respublikamızda istismara verilən  yeni generasiya güclərinin sayı artmaqdadır. Dövlət Başçısının rəhbərliyi altında ötən 10 il ərzidə 2000 MVt-dən artıq gücə malik yeni elektrik stansiyaları tikilib istifadəyə verilmişdir. O cümlədən, alternativ və bərpa olunan enerji mənbələrindən istifadə istiqamətində pik gücləri artırılmışdır.

“Azərenerji” ASC-nin Mətbuat xidməti bildirir ki, söhbət dünya standartlarına cavab verən müasir qurğu və avadanlıqlarla təchiz edilmiş, ötən il istismara verilmiş  780 meqavat gücündə “Cənub” Elektrik Stansiyasından gedir.

Müəssisənin məsul işçisinin bildirdiyinə görə, ötən ilin dekabr ayında stansiyada 345,2 milyon kilovatsaatdan artıq elektrik enerjisi istehsal edilmişdir.

Yeri gəlmişkən, istismara verildiyi 6 ay ərzində (01.01.2014-cü ilə kimi) isə stansiyada dispetçer qrafikinə uyğun olaraq 1 milyard 167 milyon kilovatsaata yaxın elektrik enerjisi istehsal edilmişdir.

Mənbəyə istinadən qeyd edək ki, sözügedən dövrdə elektrik enerji istehsalının digər texniki göstəricilərində də yüksək nəticələr əldə edilmişdir.

Mənbənin sözlərinə görə , bu avadanlıqların istismar səviyyəsinin yüksəldilməsinə, müasir metodlardan istifadəyə yönəldilmiş stansiya personalının dəqiq təşkil olunmuş işinin nəticəsidir.

Xatırladaq ki, bu stansiya ötən ilin iyul ayının əvvəlində istismara verilib. Enerji təhlükəsizliyi prinsipinə görə digər analoji stansiyalardan fərqli olaraq, bu stansiyada üç yanacaq növündən - qaz, mazut və dizel yanacağından istifadə edilməsinə imkan verən texnologiyalar tətbiq edilmişdir. Bu stansiyanın Abşeron yarımadasının və cənub bölgəsinin enerji təhlükəsizliyinin daha da möhkəmləndirilməsində, enerjinin ötürülməsi və paylaşdırılması sistemlərinin daha da dayanıqlı və sabit işləməsinin təmin edilməsində böyük rolu var.