Ötən il paylayıcı şəbəkələrdə görülən işlər və qarşıya qoulmuş tapşırıqların icrası ilə bağlı “Azərenrji” ASC-nin Mətbuat xidməti bildirir:

“Ucar Elektrik Şəbəkəsi”ndə balansda olan elektrik avadanlıqları və hava elektrik verilişi xətlərində qrafik əsasında müvafiq tədbirlər aparılır. Rayon ərazisindəki 234 ədəd transformator məntəqəsi  əsaslı və cari təmir olunub. 10 kV-lik EVX-nin 57,7  kilometrə yaxın hissəsi  və 0,4 kV-lik EVX-nin 22,1 kilometr hissəsi  təmir olunub. Yeni abonentlərə 245-dən artıq elektrik say­ğacı quraşdırılıb, 330-a yaxın sayğac yenisi ilə əvəz edilib. İl ərzində rayon mərkəzində, Qarabörk, Xalac, Alpout, Qara­dağlı, Çiyni, Ramal, Şahlıq, Bərgüşad, Bağmanlı və digər kəndlərdə müxtəlif gücə malik transformator əsaslı və cari təmir olunub. Ucar şəhərində və rayonun Bağman, Qaradağlı, Bərgüşad və Qaracallı kəndlərində paylayıcı şəbəkədə özünü büruzə verən texniki qüsurlar aradan qaldırılıb. Bəzi kəndlərdə 0,4 kV-lik xətlərin dayaqları yenisi ilə əvəzlənib. Bundan başqa, kəndlərdə  sayğac-uçtot komplektinin  baxış üçün daha münasib yerlərə köçürülməsi davam etdirilib. “Ucar”  (EŞ)də görülmüş işlər həm enerji verilişinin dayanıqlığına və keyfiyyətinə, həm də istehlak edilmiş enerji haqqının ödənilməsinə müsbət təsir göstərib.

“Şəmkir Elektrik Şəbəkəsi”ndən daxil olan məlumatda ötən il  payız-qış mövsümünə hazırlıq məqsədilə görülən işlər barədə məlumat verilib. Məlumatda bildirilir ki,   6-10 kV-lik EVX-lərdə 30 kilometrdən artıq, 0,4 kV-lik EVX-lərdə isə 30 kilometrə yaxın hissədə təmir işləri görülüb. Elektrik verilişi xətlərinin dayanıqlılığını artırmaq məqsədilə   190-a yaxın müxtəlif tipli dayaq yenisi ilə dəyişdirilib, 3 kilometrdən çox giriş kabel xətləri quraşdırılıb. Rayon üzrə  abonentlərə 500-ə yaxın elektron tipli sayğac quraşdırılıb və 400-ə qədər sayğac isə dəyişdirilib. Bununla yanaşı,  xidməti ərazidə  550-dən çox  smart-kart tipli say­ğac da quraşdırılaraq abonentlərin  ixtiyarına verilib. Ümumiyyətlə, 290-dan artıq transformator məntəqəsində təmir işləri görülüb. Bundan əlavə, transformatorlara zəruri miqdarda yağ əlavə edilib.

Regionların sosial-iqtisadi inkişafı Dövlət Proqramına əsasən, əhalinin fasiləsiz enerji təchizatını təmin etmək məqsədilə 110/35/6 kV-lik «Şəmkir SES» yarımstansiyasında 10 MVA-lıq müasir tipli transformator 25 MVA güc  transformatoru ilə dəyişdirilib. Həmçinin yarımstansiyada 10 kV-lik köhnə tipli yağ açarları da vakuum açarla əvəz edilib. 110/35/10 kV-lik «Zəyəm» yarımstansiyasının 10 kV-lik çıxışındakı yağ açarları da vakuum açarlarla dəyişdirilib. Hazırda Kür qəsəbəsində, şəhər ərazisində, Dəllər-Cəyir və Daşbulaq kəndlərində  smart-kart tipli sayğacların quraşdırılması başa çatıb.  Bu il Zəyəm və Çinarlı qəsəbələrində, habelə Düyərli və Şiştəpə kəndlərində  həmin sayğacların quraşdırılması nəzərdə tutulub.

“Göygöl Elektrik Şəbəkəsi”nin kollektivi yeni ilin ilk günlərindən başlayaraq avadanlıqların texniki istismar səviyyəsinin yüksəldilməsi, növbəti  mövsüm üçün tədbirlər planının hazırlanması istiqamətində işlərə start verib. Şəbəkədən verilən məlumata görə, rayonda ötən il xeyli təmir-bərpa və yenidənqurma işləri görülüb. 6 kV-lik «Murud» hava xəttində 25 ədəd dayaq basdırılıb və 1 kilometr uzunluğunda hava xətti çəkilib. Eyni zamanda, «Üçtəpə» hava xəttində 2 ədəd dəmir-beton dayaq basdırılıb və 0,42 kilometr uzunluğunda yeni hava xətti istifadəyə verilib. 10 kV-lik «Göyçəkənd» və «Nadel» hava xətlərində 3, «Kökəltmə» hava xəttində 5, «SAS» hava xəttində 4 ədəd dəmir-beton və metal dayaq, 04 kV-lik «Göyçəkənd» hava xəttində 15, «Aşıqlı» hava xəttində  9, «Çaylı», «Cümşüdlü» və «Üçtəpə» hava xətlərinin  hər birində 2 ədəd yeni dayaq basdırılıb. Bununla yanaşı, «Hacıkənd», «Göyçəkənd», «Quşqara» və «Mollacəlilli» hava xətlərində həm yeni dayaqlar basdırılıb, həm də yeni naqillər çəkilib.

Ötən il müxtəlif gücdə olan  80-dan artıq transformator, zəruri miqdarda  yağ əlavə edilməklə, əsaslı və cari təmirdən çıxarılıb.  Rayon mərkəzində  SİP kabeli çəkilişi davam etdirilib. Bir sıra hava xətlərində dayaq­lar yenisi ilə əvəzlənib.

35/10 kV-lik «Alıuşağı, «Göygöl-1» yarımstansiyalarında yenidənqurma işləri aparılıb.  Xidməti ərazidə küçə işıqlandırması üçün 220 ədəd dayaq basdırılaraq 5,5 kilometr yeraltı kabel xətti çəkilib. Göygöl şəhərində 6 küçədə 52 kilometr 6 kV-lik, 90,5 kilometr 0,4 kV-lik yeraltı kabel xətti çəkilib, qapalı mərkəzi paylayıcı qurğular  inşa edilib.

Bununla yanaşı, rayon mərkəzində 10-6 kV-lik  elektrik verilişi xəttinin 10,9 kilometr, 0,4 kV-lik elektrik veriliş xəttinin isə 12,6 kilometr hissəsində təmir-sazlama işləri həyata keçirilib. İl ərzində 1900-ə yaxın  sayğac-uçot komplekti  quraşdırılıb. 430-dan artıq müasir tipli sayğac-uçot    komplekti  abonentlərin ixtiyarına verilib, 270-dən artıq smart-kart tipli sayğac quraşdırılıb. Son illər “Göygöl” EŞ-də aparılan fundamental yeniliklər deməyə imkan verir ki, rayonda  dayanıqlı elektrik enerji təchizatı üçün möhkəm zəmin yaradılır.