Xidməti ərazilərində daha dayanıqlı elektrik enerjisi təminatının yaradılması məqsədilə “Mingəçevir Elektrik Şəbəkəsi”nin (EŞ) balans mənsubiyyətinə daxil olan elektrik verilişi xətlərində (EVX) və transformator məntəqələrində son aylar ərzində bir sıra sistem əhəmiyyətli təmir-bərpa işləri yerinə yetirilmişdir.

Müəssisədən “Azərenerji” ASC-nin Mətbuat xidmətinə daxil olan məlumatda  qeyd edilir ki, ümumiyyətlə mövsümə hazırlıqla əlaqədar olaraq tədbirlər planı hazırlanıb həyata keçirilir. Tədbirlər planına uyğun olaraq, dayanıqlığın daha da möhkəmləndirilməsi məqsədilə 110 kV-lik “Şəhər” yarımstansiyasından çıxan 6 kV-lik 8, 19 və 25 saylı “Şəhər”, “Az.İES” yarımstansiyasından çıxan 6 kV-lik “Jildom” və digər hava elektrik xətləri təmir edimişdir. Bir sözlə, 6 kV-lik şəbəkə üzrə nəzərdə tutulmuş işlər qrafikə uyğun uğurla başa çatmış və 2,2 km-ə yaxın xətdə də müxtəlif təyinatlı təmir işləri aparılmış, 300 mertrə yaxın naqil yenisi ilə əvəzlənmişdir. Eyni zamanda dayaqlar düzləndirilmiş, xətlərin qabariti normallaşdırılmış və trassası yaşıl kütlədən təmizlənmişdir.

Qeyd edək ki, müəssisənin xidməti ərazisində olan 0,4 kV-lik enerji daşıyıcılarında da müvafiq təmir-bərpa işlər yerinə yetirilib. O cümlədən, 349 metr naqil SİP kabel xətti ilə əvəzlənmiş və 1,6 km-ə yaxın hissədə isə əsaslı və cari təmir işləri aparılmışdır. Yeri gəlmişkən, ötən ilin son 3 ayı ərzində rayon üzrə 37 TM-də müxtəlif təyinatlı təmir işləri həyata keçirilmişdir. Onu da qeyd edək ki, həyata keçirilən analoji tədbirlər yarımstansiyaların, elektrik verilişi xətlərinin qəzasız və dayanıqlı işləməsi üçün əsaslı zəmin yaradır.

Mənbə istehlakçılara verilən elektrik enerjisinin haqqının ödənilməsi sahəsində də vəziyyətin normal olduğunu bildirərək qeyd etdi ki, ötən ilin 12 ayı ərzində müəssisə üzrə ümumi istehlak 136,8 milyon kilovatsaata, o cümlədən dekabr ayında isə 16,1 milyon kilovatsaata yaxın olmuşdur. Nəticədə 2012-ci ilin 12 aylıq göstəriciləri ilə müqayisədə istehlak 714 min kilovatsaata yaxın azalmış, ödənişdə mütləq artım isə bir faizdən çox olmuşdur.  O cümlədən, dekabr ayında istehlak 695 min kilovatsaatdan çox, ödəniş isə mütləq 8 faizə yaxın artmışdır. Onu da qeyd etmək yerinə düşərdi ki, 2013-cü ildə daimi əhali istehlakçıları üzrə 47,1 milyon kilovatsaata yaxın elektrik enerjisi istehlak edilmidir ki, bu da 2012-ci ilin eyni dövründəki istehlakdan 1,2 milyon kilovatsaat azdır. Ödəniş isə mütləq 2 faizdən çox artmışdır. O cümlədən, dekabr ayında isə istehlak 2012-ci ilin müvafiq dövrü ilə müqayisədə `355 min kilovatsaat artaraq 6,4 milyon kilovatsaata yaxın olmuşdur. Ödənişdə mütləq artım isə 15 faizə yaxın olmuşdur.

Mənbə onu da bildirdi ki, müəssisənin xidməti ərazisində 2013-cü ilin dekabr ayında  keçirilmiş reydlər zamanı 3 qayda pozuntusu (bunun 2-i məişət abonenti (əhali) istehlakçılar qrupuna aiddir)  faktı aşkar edilərək müvafiq qaydada aktlaşdırılmışdır. Nəticədə 8,5 min kilovatsaata yaxın (bundan 5 min kilovatsaata yaxını məişət abonenti (əhali) istehlakçılar qrupuna aiddir) itirilmiş elektrik enerjisinin 510 manata yaxın istehlak dəyəri bərpa edilmişdir.  Ümumiyyətlə, ötən ilin 12 ayı ərzində burada 208 qayda pozuntusu (bundan 164-ü məişət abonenti (əhali) istehlakçılar qrupuna aiddir)  faktı aşkar edilərək 4 milyon 67,9 min kilovatsaata yaxın (bundan 3 milyon 797,9 min kilovatsaatdan artıq məişət abonenti (əhali) istehlakçılar qrupuna aiddir) itirilmiş elektrik enerjisinin 244 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 27 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.