Respublikamızın kənd təsərrüfatı rayonlarından olan Tərtərin elektrik enerji təchizatının dayanıqlılığı tam təmin edilir.  Rayon elektrik şəbəkəsinin kollektivi bu sahədə üzərinə düşən vəzifələri layiqincə yerinə yetirməyə çalışır.

Şəbəkənin istismar səviyyəsinin yüksəldilməsi məqsədilə görülən tədbirlər barədə “Azərenerji” ASC-nin Mətbuat xidmətinə daxil olan məlumata görə,  yarımstansiyalarda, transformator məntəqələrində avadanlıqlara davamlı texniki baxış keçirilib və ötən ilin son üç ayı ərzində 13 TM-də müxtəlif təyinatlı təmir işləri görülmüş, həmçinin müəyyən qədər çıxış kabelləri SİP kabellərlə əvəz edilmişdir. Eyni zamanda müxtəlif gücə malik iki transformator təmirdən sonra təkrar şəbəkəyə qoşulmuşdur.

Qeyd edək ki,  həm rayon mərkəzində, həm də kəndlərdə enerji təsərrüfatının təhlükəsizliyinin daha da möhkəmləndirilməsi üçün məqsədyönlü tədbirlər 2013-cü ilin son üç ayında da davam etdirilmişdir. Rayon mərkəzi, Xoruzlu, Hüsənli, Dəmirlər və digər bir nüçə kəndlərdəki paylayıcı şəbəkələrdə əsaslı təmir və yenidənqurma işləri aparılmışdır. Ümumiyyətlə, sözügedən dövrdə 10 və 0,4 kV-lik xətlərin 23 kilometrə yaxın hissəsi təmir edilmiş, 2,2 km-dən çoxu dəyişdirilmiş, 14 ağac dayaq dəmir beton dayaqla əvəzlənmiş və 14 travers quraşdırılmışdır. Eyni zamanda 500 metrə yaxın kabel xətti də çəkilmişdir. Bütün bunlarla yanaşı xətlərin ətrafı yaşıl kütlədən təmizlənmiş, məftillər dartılmış və digər qabaqlayıcı tədbirlər görülmüşdür.

Onu da qeyd edək ki, həyata keçirilən işlər müəssisənin digər texniki-iqtisadi göstəricilərinə də müsbət təsir göstərir. 2013-cü ilin dekabr ayında müəssisə üzrə 8,8 milyon kilovatsaatdan artıq elektrik enerjisi istehlak edilmişdir ki, bu da 2012-ci ilin eyni dövründəki istehlakdan 530 min kilovatsaat çoxdur. O cümlədən, daimi əhali qrupu üzrə bu göstəricilər müvafiq olaraq 2,5 milyon kilovatsaatdan və 121 min kilovatsaatdan çox olmuşdur. Yeri gəlmişkən, ötən ilin 12 ayı ərzində isə müəssisənin xidməti ərazisində 113,3 milyon kilovatsaata yaxın elektrik enerjisi istehlak edilmişdir ki, bunun da 25,4 milyon kilavatsata yaxını daimi əhali istehlakçı qrupuna aiddir. Nəticədə 2012-ci illə müqayisədə ümumi istehlak 9,2 milyon kilovatsaatdan, ödəniş isə mütləq 10 faizdən çox artmışdır. O cümlədən, daimi əhali qrupunda isə istehlak 2012-ci ilin eyni dövrü ilə müqayisədə 890 min kilovatsaata yaxın azalmış, ödənişdə mütləq artım isə 5 faizdən çox olmuşdur.

Verilən məlumata əsasən, istehlakçıların sayğac-uçot komplektinə baxış keçirilən zaman aşkar edilən qayda pozuntularına görə,  ötən ilin dekabr ayında 55-ə yaxın (bunun 50-si məişət abonenti (əhali) istehlakçı qrupuna aiddir) istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 220,2 min  kilovatsaatdan artıq (bunun 176,7 min kilovatsaata yaxını məişət abonenti (əhali) istehlakçı qrupuna aiddir) itirilmiş elektrik enerjisinin 13,2 min manatdan çox istehlak dəyəri bərpa edilmişdir. 2013-cü ilin 12 ayı ərzində isə burada 910-dan artıq (bunun 793-ü məişət abonenti (əhali) istehlakçı qrupuna aiddir) qayda pozuntusu faktı aşkar olunmuşdur. Nəticədə 5 milyon 287,2 min kilovatsaatdan artıq (bunun 3 milyon 86 min kilovatsaata yaxını məişət abonenti (əhali) istehlakçı qrupuna aiddir) itirilmiş elektrik enerjisinin 317,2 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 93 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.