Bakı şəhəri, Bakıətrafı kəndlər və ümumilikdə Abşeron yarımadasının elektrik enerjisi təchizatının həyata keçirilməsində “Abşeron Regional Elektrik Şəbəkəsi”nin (REŞ) özünəməxsus yeri və rolu var. Bütün enerji obyektlərində olduğu kimi, burada da avadanlıqların iş səmərəliliyinin artırılması məqsədilə bir sıra əsaslı təmir və texniki təftiş işləri aparılmış, enerjinin ötürülməsi və paylaşdırılması sistemlərinin sabit və dayanıqlı işləməsinin, istismar səviyyəsinin  yüksəldilməsi istiqamətində tədbirlər ötən ilin son üç ayında da uğurla həyata keçirilmişdir. O cümlədən, 110 kV-lik yeraltı “Bayıl” yarımstansiyasının tikinti quraşdırma işləri başa çatdırılmışıdr.

Sözügedən müəssisədən qeyd edilən dövrdə görülmüş işlər barəsində “Azərenerji” ASC-nin Mətbuat xidmətinə daxil olan məlumata  görə, “İfrat yüklənmə rejimində işləyən transformatorların yeni güclü transformatorlarla əvəz edilməsi” tədbirlərinə uyğun olaraq 220 kV-lik “Şəngəçal” yarımstansiyasında 1 saylı 125 MVA-lıq avtotransformator 200 MVA-lıqla, 110 kV-lik “Puta” yarımstansiyasında isə 40 MVA-lıq transformator 63 MVA-lıqla əvəz edilmişdir. Eyni zamanda “Səngəçal” yarımstansiyasında 220 kV-lik tərəfdə 5-ci bölmənin tikinti işləri başa çatdırılmış, 220/110 kV-lik açıq paylayıcı quruluşda (APQ) isə yenidənqurma işləri davam etdirilir.

Qeyd edək ki, sözügedən dövrdə 500 kV-lik “Abşeron” yarımstansiyasında 220 kV-lik APQ-də yenidənqurma işləri qrafikə uyğun yerinə yetirilmiş və bu istiqamətdə işlər hazırda davam etdirilir. Paralel olaraq 500 kV-lik II “Abşeron”, 330 kV-lik I “Abşeron”, IV və VIII “Şirvan” hava xətlərində müxtəlif təyinatlı təmir və sınaq işləri həyata keçirilmişdir. Eyni zamanda 220 kV-lik “Müşviq” yarımstansiyasında yeni quraşdırılmış 3 sayli avtotransformatorun 10 kV-lik tərəfində reaktorun və paylayıcı məntəqənin (PM) quraşdırılması başa çatdırılmış, idarəetmə məntəqəsində isə 110/220 kV-lik idarəetmə lövhələrinin yenisi ilə əvəz olunması işləri davam etdirilir. Bütün bunlarla yanaşı hesabat dövründə “Səngəçal” ES-220 kV-lik “Müşviq” YS arasında 110 kV-lik iki dövrəli HX-nin də tikintisi başa çatdırılmışdır.

Mənbə onu da bildirdi ki, sözügedən dövrdə 110 kV-lik “Zabrat” yarımstansiyasında (YS) yeni 10 kV-lik qapalı paylayıcı quruluşun (QPQ) tikintisi və avadanlıqların quraşdırılması işləri başa çatdırılmışdır. Eyni zamanda yeni 360 MVA gücündə 220 kV-lik “Zabrat” YS-nin tikintisi tamamlanmış, hazırda 110 kV-lik çıxış kabellərin tikintisinə başlanmışdır.

Yeri gəlmişkən, yeni 220 kV-lik “Zabrat” YS-nin eyni gərginlikli tərəfinin enerji sistemlə əlaqələndirilməsi üçün yeni I və II “Zabrat”, III-IV “Hövsan” HX-ləri tikilib istismara verilmişdir.

Digər başa çatdırılmış işlərlə bağlı mənbə onu da bildirdi ki, ötən ilin son üç ayı ərzində 220 kV-lik “Hövsan” YS-də eyni gərginlikli APQ-də yeni bölmənin, 110 kV-lik “Ramana” YS-də yenidənqurma işləri ilə əlaqədar eyni gərginlikli eleqaz və cərəyan transformatorların quraşdırılması işləri başa çatdırılmışdır. Eyni zamanda həmin bu dövrdə 110 kV-lik II “Maştağa” HX-də bir neçə dayaq arası hava xətti kabel xətti ilə əvəzlənmişdir.

Sonda onu da qeyd edək ki, hazırda 220 kV-lik “Böyükşor” YS-nin, 220 kV-lik “Ağsu” və “Qəbələ” HX-lərin tikintisi davam etdirilir.