“Postsovet məkanında ilk dəfə olaraq ölkəmizdə generasiya güclərinin paylanmış struktur konsepsiyasını əsas götürərək porşen tipli mühərriklərlə təmin olunmuş generatorlardan ibarət olan generasiya gücləri tikilərək istismara verilmişdir. Belə enerji obyektlərindən biri də “Şəki” elektrik stansiyasıdır. Tələbatçılara keyfiyyətli və dayanıqlı elektrik enerjisinin ötürülməsində kollektivimiz səylə çalışır, aqreqatlarda aparılan texniki xidmət işlərində fəal iştirak edirlər. Yola saldığımız 2013-cü ildə də uğurlu nəticələr əldə edilmişdir. Hazırda aqreqatlar dispetçer qrafikinə uyğun olaraq fəaliyyət göstərir”. Bu barədə “Azərenerji”  ASC-nin Mətbuat xidmətinə “Şəki” elektrik stansiyasından bildirilmişdir.

Sözügedən müəssisədən daxil olan məlumata görə, 2013-cü il ərzində burada 310,7 milyon  kilovatsaatdan artıq elektrik enerjisi istehsal edilmişdir. O cümlədən ötən ilin dekabr ayında isə enerji obyektində 28,8 milyon kilovatsaata yaxın elektrik enerjisi istehsal edilmişdir.

Qeyd edək ki, avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsi və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində ötən ildə stansiyanın digər texniki iqtisadi göstəricilərində də qənaətbaxş nəticələr əldə olunmuşdur.

Mənbədən əldə etdiyimiz digər bir məlumata görə, stansiyada aqreqatların hamısı saz vəziyyətdədir. İstismar səviyyəsinin yüksək həddə saxlanılmasını təmin etmək üçün texniki məsələlərə diqqətlə yanaşılır, vaxtlı-vaxtında texniki baxışlar keçirilir və zəruri operativ tədbirlər görülür. Belə ki, tələbatçıların daha keyfiyyətli və dayanıqlı elektrik enerjisi ilə təmin edilməsi istiqamətində ötən ilin son üç ay ərzində stansiyada beş aqreqatda növbəti istismar həddinə uyğun texniki qulluq işləri həyata keçirilmişdir. Eyni zamanda bütün generatorlarda, beş güc transformatorunda və eyni sayda eleqaz açarında yoxlama və sınaq işləri görülmüşdür. Yeri gəlmişkən, cari ildə digər aqreqatlarda da əsaslı texniki xidmət işlərinin yerinə yetirilməsi nəzərdə tutulmuşdur.

Onu da qeyd edək ki, digər müəssisələr kimi, burada da yanğın təhlükəsizliyi məsələsi daim diqqət mərkəzindədir. Belə ki, yanğın təhlükəsizliyinin təmin edilməsi üçün yanğın su çəni, nasos qurğusu, su kəməri şəbəkəsi və digər avadanlıqlar yoxlanılmış, aşkar edilmiş qüsurlar aradan qaldırılmış və daimi nəzarətdə saxlanılır.

Sonda onu da qeyd edək ki, işçilərin iş şəraitinin yaxşılaşdırılması istiqamətində də işlər həyata keçirilmişdir. Müəssisənin işçi personolı tərəfindən iş yerlərində sanitar gigiyena normalarının tələblərinə, əməyin mühafizəsi və təhlükəsizlik texnikası qaydalarına ciddi riayət edilmişdir. Xatırladaq ki, 10 aqreqatdan ibarət olan “Şəki” elektrik stansiyasının ümumi gücü  87 MVt-dır.