“Qusar Elektrik Şəbəkəsi”nin kollektivi 2013-cü ilin əvvəlindən başlayaraq istismar səviyyəsinin daha da yüksəldilməsi üçün üzərlərinə düşən vəzifələrin icrası istiqamətində əhəmiyyətli fəaliyyət göstərib. Görülən işlərlə bağlı şəbəkədən “Azərenerji” ASC-nin Mətbuat xidmətinə daxil olan məlumatda bildirilir ki, 110 kilovoltluq “Qusar” yarımstansiyasında 1 və 2 saylı 10 MVA-lıq transformatorların 110 kV-lik dövrələrində, güc transformatorlarında təmir, ölçü sınaq işləri aparılıb. 10 kV-lik qapalı paylayıcı quruluşun binasının təmiri başa çatdırılıb. Şəbəkənin balansındakı 35 kV-lik güc transformatorlarında da analoji tədbirlər reallaşdırılıb, 1 ədəd yağ açarı təmir edilib və yağ açarlarına yağ əlavə olunub.

Qeyd edək ki, şəbəkənin gücləndirilməsi və enerji təchizatının yaxşılaşdırılması məqsədilə 10, 6  və 0,4 kV-lik şəbəkələrdə də xeyli təmir və quraşdırma işləri aparılıb. Bu işlər əsasən 110/35/10 kV-lik “Qusar” yarımstansiyasından çıxan 17 saylı şəhər hava xəttində reallaşdırılıb. Buradakı dayaq, izolyator və naqillərin daha keyfiyyətliləri ilə dəyişdirilməsinə nail olunub. G.Əbilov küçəsindən keçən hissədə isə hava xəttinin əvəzinə 360 metr 10 kV-lik yeraltı kabel çəkilib. Oxşar tədbirlərin aparılması “Yasab”, “Aşağı Ləyər”, “Sudur”, “İmamqulukənd”, “Həzrə” və sair hava xətlərində də həyata keçirilib.

Mənbə onu da bildirdi ki, şəhərin 0,4 kV-lik elektrik verilişi xətləri üzrə görülən işlərin də miqyası yetəcək qədər bö­yükdür. Müvafiq tədbirlər “Ba­laqusar”,  “Kuzun”, “Əniğ”, “Xu­ray”, “Urva”, “Düztahir”, “Sudur”, “Yeni Həyat”, “Şir­vanovka” və digər xətlərdə reallaşdırılıb. Görülən işlər isə əsasən dayaq və xətlərin daha keyfiyyətliləri ilə əvəz olunmasından ibarətdir.

Rayonun Yuxarı Ləyər kəndində 0,4 kV-lik elektrik verilişi xətləri üzrə 114 ədəd yeni dəmir-beton dayaq quraşdırılıb, 4 kilometrə yaxın müxtəlif markalı kabel xətti çəkilib. Yasab tala kəndindəki 6 kV-lik “Qullar” hava xəttində də oxşar işlər həyata keçirilib. Analoji işlər İmamqulukənd oba, Mucuq oba, Çetkun və sair kəndlərdən keçən 10 kV-lik xətlərdə də reallaşdırılıb.

Güc artımı ilə əlaqədar abonentlərin daha keyfiyyətli elektrik enerjisi ilə təmin olunması məsələsinə də diqqət yetirilib. Bu məqsədlə Həsənqala, Qalacıq və Kuzun kəndlərində mövcud olan transformatorlar daha güclüləri ilə əvəz olunub. Bundan başqa 115 ədəd transformator məntəqəsində profilaktik təmir işləri aparılıb, transformatorlara yağ əlavə olunub, faza yüklərinin ölçülməsi üçün ölçü-sınaq işləri aparılıb.

2013-cü ildə texniki itkilərin azaldılması tədbirlər planına əsasən Aşağı Kalunxur və Urva kəndlərində tədbirlər görülüb. Bir sıra transformatorlar yükə uyğun yenisi ilə əvəzlənib. Bundan başqa xeyli sayda abonentin sayğacı və həyətlərdən keçən dayaqlar həyətlərdən küçəyə çıxarılıb. Həyətlərdən keçən açıq naqillər isə SİP kabellərlə əvəz edilib.