“Azərenerji” ASC-nin bütün enerji obyektlərində olduğu kimi, “Neftçala Elektrik Şəbəkəsi”nin  (EŞ) də balans mənsubiyyətinə aid olan transformator məntəqələrində (TM) və enerjidaşıyıcı xətlərdə təmir işləri uğurla həyata keçirilmişdir. EŞ-dən “Azərenerji” ASC-nin Mətbuat xidmətinə  verilən məlumata görə, avadanlıqların iş səmərəliliyinin artırılması məqsədilə bir sıra əsaslı təmir və texniki təftiş işləri aparılmış, enerjinin ötürülməsi və paylaşdırılması sistemlərinin sabit və dayanıqlı işləməsinin, istismar səviyyəsinin  yüksəldilməsi istiqamətində bir sıra tədbirlər həyata keçirilmişdir.

Mənbəyə istinadən qeyd edək ki, ötən ilin son üç ayı ərzində yenidənqurma tədbirləri ilə əlaqədar olaraq 6 və 10 kV-lik EVX-lərin 2,2 km-dən artıq, 0,4 kV-lik xətlərin isə 13,4 km-ə yaxın hissəsində müxtəlif təyinatlı təmir-bərpa işləri həyata keçirilmişdir. Qeyd edək ki, şəbəkənin əməkdaşları tərəfindən ötən ilin son üç ayı ərzində 13 TM-də yenidənqurma işləri aparılmış, ümumi gücü 0,7 MVA olan 5 transformatorda əsaslı təmir olunaraq normal iş rejiminə gətirilərək istehlakçıların xidmətinə verilmişdir.    Yeri gəlmişkən, təsdiq edilmiş plan-qrafikdə nəzərdə tutulmuş və istismar zamanı mövcud olan digər təmir-bərpa işlərinin müvəffəqiyyətlə həyata keçirilməsi istiqamətində hazırda tədbirlər davam etdirilir.

“Elektrik enerjisindən istifadə zamanı qaydaların pozulmasının qarşısının alınması istiqamətində də xeyli işlər görülmüş və bu istiqamətdə tədbirlər davam etdirilir”, – deyən mənbə onu da bildirdi ki,  ötən ilin noyabr ayında müəssisə üzrə 100-ə yaxın qayda pozuntusu aşkar edilərək 285,1 min kilovatsaatdan artıq itirilmiş elektrik enerjisinin 17,1 min manatdan çox istehlak dəyəri bərpa edilmişdir. Onu da qeyd edək ki, ötən ilin 11 ayı ərzində isə istehlakçıların elektrik enerjisindən istifadə qaydalarına riayət etmələrinin yoxlanılması ilə bağlı keçirilmiş reydlər zamanı 680-dan artıq istehlakçının sayğac uçot komplektində qüsur aşkar edilərək 2 milyon 773,4 min kilovatsaata yaxın itirilmiş elektrik enerjisinin 166,4 min manatdan artıq istehlak dəyəri bərpa edilmişdir. Həyata keçirilmiş müvafiq tədbirlər nəticəsində həmin bu məbləğin 69 faizə yaxın hissəsinin ödənişi təmin edilmiş və qalan hissənin ödənilməsi üçün müvafiq tədbirlər görülür.

“Həyata keçirilmiş məqsədyönlü tədbirlər nəticəsində 2012-ci ilin müvafiq dövrü ilə müqayisədə istehlak edilmiş elektrik enerjisinin dəyərinin ödənişində dinamik artım qeydə alınmışdır”- deyən mənbə qeyd etdi ki, ötən ilin noyabr ayında müəssisə üzrə 11,5 milyon kilovatsaata yaxın elektrik enerjisi istehlak edilmişdir. Bu da 2012-ci ilin müvafiq dövründəki istehlakla müqayisədə 865 min kilovatsaat çoxdur.  İstehlak edilmiş elektrik enerjisinin dəyərinin ödənişi isə 2012-ci ilin eyni dövründəki göstərici ilə müqayisədə mütləq 5 faizə yaxın artmışdır. O cümlədən, daimi əhali istehlakçı qrupunda isə istehlak 2012-ci ilin müvafiq dövrü ilə müqayisədə 20 min kilovatsaata yaxın artaraq 4,7 milyon kilovatsaatdan çox, ödənişdə  mütləq artım isə bir faizə yaxın olmuşdur. Qeyd edək ki, ötən ilin 11 ayında müəssisə üzrə istehlak 2012-ci ilin müvafiq dövrü ilə müqayisədə 2,6 milyon kilovatsaatdan çox artaraq 126,7 milyon kilovatsaata yaxın olmuşdur. Ödəniş isə 2012-ci ilin müvafiq dövrü ilə müqayisədə mütləq 6 faizə yaxın artmışdır. O cümlədən, daimi əhali istehlakçı qrupu üzrə istehlak 2012-ci ilin müvafiq dövrü ilə müqayisədə 5,5 milyon kilovatsaatdan çox azalaraq 43,5 milyon kilovatsaatdan artıq olmuşdur.