"Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nın icrası ilə əlaqədar Şəmkir rayonunda da xeyli işlər həyata keçirilmişdir. Rayonun elektrik enerjisi təchizatı sisteminin təkmilləşdirilməsi məqsədilə bir sıra tədbirlər görülmüşdür.

“Şəmkir Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumata görə,  ötən illərdə olduğu kimi, 2013-cü ildə də rayonun enerji təsərrüfatında diqqətəlayiq işlər yerinə yetirilib. O cümlədən, ötən ilin son üç ayı ərzində EŞ-in xidməti dairəsinə məxsus olan 10 kV-lik elektrik verilişi xəttlərinin 6,8 km-ə yaxın hissəsinin və dayaqlarının dəyişdirilməsini bu tədbirlər sırasına daxil etmək olar.  Qeyd edək ki, sadalanan tədbirlərlə yanaşı, sayğacların həyətlərdən çıxardılaraq küçələrdə quraşdırlması və yeni smartkart tipli sayğacların quraşdırılması işləri də davam etdirilmişdir.  Ümumilikdə, sözügedən dövrdə 0,4 kV-lik şəbəkələrdə 9,2 kilometrdən artıq xəttdə yenidənqurma və təmir işləri aparılmış, 180-ə yaxın (bunun 80-dən çoxu smartkart tiplidir) sayğac quraşdırılmışdır. Bütün bunlarla yanaşı 40-dan artıq TM-də müxtəlif təyinatlı təmir işləri görülmüş və ümumi gücü 6 MVA-dan artıq olan 50-ə yaxın transformator təmir edilərək şəbəkəyə qoşulmuşdur.

“Həyata keçirilən təmir-bərpa işləri nəinki istismar səviyyəsinin daha da yüksəldilməsində, enerji haqlarının ödənilməsində, eyni zamanda elektrik enerjisindən qeyri-qanuni istifadə hallarının qarşısının alınmasında da mühüm rol oynayır”, – deyən mənbə onu da bildirdi ki, burada ötən ilin noyabr ayında keçirilmiş reydlər zamanı 83 istehlakçının elektrik enerjisindən istifadə qaydalarını pozması faktı aşkar edilərək 1 milyon 91,2 min kilovatsaata yaxın itirilmiş elektrik enerjisinin 65,5 min manata yaxın istehlak dəyəri bərpa edilmişdir. Onu da qeyd edək ki, ötən ilin 11 ayı ərzində isə müəssisə üzrə 740-dan artıq qayda pozuntusu faktı aşkar edilərək 11 milyon 882,2 min kilovatsaata yaxın itirilmiş elektrik enerjisinin 712,9 min manatdan artıq istehlak dəyəri bərpa edilmişdir. Həmin bu məbləğin 91 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir. Onu da qeyd etmək yerinə düşərdi ki, ötən ilin 11 ayı ərzində müəssisə üzrə aşkar edilmiş qayda pozuntularına görə 30 istehlakçının sənədləri tədbir görülməsi üçün hüquq-mühafizə orqanlarına göndərilmişdir. Qayda pozuntularının təsnifatı və istehlakçı qrupu barədə əldə etdiyimiz məlumata istinadən bildirək ki,  elektrik enerjisindən yenə də kənar xətt vasitəsilə istifadə edilməsi halı üstünlük təşkil etmiş və ən çox qayda pozuntusu  məişət abonenti (əhali) istehlakçı qrupunda aşkar edilmişdir.

Onu da qeyd etmək yerinə düşərdi ki, ötən ilin 11 ayı ərzində müəssisə üzrə ümumilkdə 289 milyon kilovatsaata yaxın (bunun 81,5 milyon kilovatsaatdan çoxu daimi əhali qrupu tərəfindən istehlak edilib), o cümlədən ötən ilin noyabr ayında isə 29,4 milyon kilovatsaata yaxın (bunun 8,8 milyon kilovatsaatdan çoxu daimi əhali qrupu tərəfindən istehlak edilib) elektrik enerjisi istehlak edilmişdir. Nəticədə 2012-ci ilin müvafiq dövri ilə müqayisədə ötən ilin 11 ayı ərzində ümumi istehlak 15,1 milyon kilovatsaata yaxın artmış (daimi əhali qrupunda isə 7,3 milyon kilovatsaata yaxın artmış), o cümlədən noyabr ayında isə ümumi istehlak 3,6 milyon kilovatsaatdan artıq (daimi əhali qrupunda isə 1,6 milyon kilovatsaata yaxın) artmışdır. 2012-ci ilin müvafiq dövri ilə müqayisədə ötən ilin 11 ayı ərzində ümumi ödənişdə mütləq artım 9 faizdən artıq (daimi əhali qrupunda isə mütləq artım 5 faizə yaxın), o cümlədən noyabr ayında isə ümumi ödənişdə mütləq artım 47 faiz (daimi əhali qrupunda isə mütləq artım 12 faizdən artıq) olmuşdur.