Qərb bölgəsinin elektrik enerjisinə olan tələbatının ödənilməsində mühüm rol oynayan “Gəncə Regional Elektrik Şəbəkəsi”ndə (REŞ) texniki  göstəricilərin yaxşılaşdırılması, istehlakçıların daha da keyfiyyətli və dayanıqlı elektrik enerjisi ilə təmin edilməsi, o cümlədən mövsümə hazırlıq məqsədilə müvafiq tədbirlər həyata keçirilmişdir. Gədəbəy rayonunun inzibati ərazsində yerləşən elektrik verilişi xətlərində və transformator məntəqələrində (TM) görülmüş cari və əsaslı təmir işləri barəsində “Azərenerji” ASC-nin Mətbuat xidmətinə daxil olan məlumatda belə deyilir.

Mənbənin bildirdiyinə görə, ötən ildə də rayonun elektrik sisteminin fəaliyyətini sağlamlaşdırmaq, elektrik enerjisi ilə təminatını daha da yaxşılaşdırmaq məqsədi ilə mühüm işlər görülüb. O cümlədən, ötən ilin son üç ayı ərzində EŞ-in xidməti ərazisində həyata keçirilmiş yenidənqurma  və təmir işləri çərçivəsində 90-dan artıq sayğac xüsusi qutularda baxış üçün maneəsiz yerdə quraşdırılmış, 3,2 kilometrə yaxın 0,4 kV-luq xətt təmir edilmişdir. Bununla yanaşı, 26 TM-də müxtəlif təyinatlı təmir işləri həyata keçirilmiş və ümumi gücü 5,3 MVA-ya yaxın olan 25-dən artıq transformator da təmir olunaraq istifadəsinə verilmişdir.  Qeyd edək ki, təmir işləri zamanı 10 kV-lik xətlərin ümumilikdə 10,2 kilometrdən artıq hissəsi əsaslı təmir edilmişdir. Onu da qeyd edək ki, rayonun elektrik enerjisi ilə təchizatı sahəsində görülən zəruri tədbirlər keyfiyyəti və istismar səviyyəsini daha da yüksəltmişdir.

“Elektrik enerjisindən istifadə zamanı qaydaların pozulmasının qarşısının alınması istiqamətində də xeyli işlər görülmüş və bu istiqamətdə tədbirlər davam etdirilir”, – deyən mənbə onu da bildirdi ki,  ötən ilin noyabr ayında müəssisə üzrə 22  qayda pozuntusu aşkar edilərək 115,5 min kilovatsaata yaxın itirilmiş elektrik enerjisinin 6,9 min manatdan artıq istehlak dəyəri bərpa edilmişdir. Onu da qeyd edək ki, ötən ilin 11 ayı ərzində isə istehlakçıların elektrik enerjisindən istifadə qaydalarına riayət etmələrinin yoxlanılması ilə bağlı keçirilmiş reydlər zamanı 230-a yaxın istehlakçının sayğac uçot komplektində qüsur aşkar edilərək 1 milyon 134,2 min kilovatsaata yaxın itirilmiş elektrik enerjisinin 68,1 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 75 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir. Onu da qeyd etmək yerinə düşərdi ki, ötən ilin 11 ayı ərzində müəssisə üzrə aşkar edilmiş qayda pozuntularına görə 3 istehlakçının sənədləri tədbir görülməsi üçün hüquq-mühafizə orqanlarına göndərilmişdir.

Mənbə onu da qeyd etdi ki, ötən ilin noyabr ayında müəssisə üzrə 3,1 milyon kilovatsaatdan artıq elektrik enerjisi istehlak edilmişdir. Bu da 2012-ci ilin müvafiq dövründəki istehlakla müqayisədə 169 min kilovatsaat azdır.  O cümlədən, daimi əhali istehlakçı qrupunda isə istehlak 2012-ci ilin müvafiq dövrü ilə müqayisədə 72 min kilovatsaata yaxın artaraq 2,6 milyon kilovatsaatdan çox olmuşdur. Qeyd edək ki, ötən ilin 11 ayında müəssisə üzrə istehlak 2012-ci ilin müvafiq dövrü ilə müqayisədə 2,3 milyon kilovatsaatdan çox azalaraq 31,4 milyon kilovatsaatdan artıq olmuşdur. O cümlədən, daimi əhali istehlakçı qrupu üzrə bu göstəricilər müvafiq olaraq 1,9 milyon kilovatsaata və  24,5 milyon kilovatsaata yaxın olmuşdur.