Digər enerji obyektlərində olduğu kimi, “Yardımlı Elektrik Şəbəkəsi”nin (EŞ) də xidməti ərazisində istehlakçıların dayanıqlı və keyfiyyətli elektrik enerjisi ilə təmin edilməsi məqsədlə transformator məntəqələrində (TM), ötürücü və paylayıcı şəbəkələrdə yenidənqurma işləri, eləcə də əsaslı və cari təmir işləri yerinə yetirilir. Hazırda bu istiqamətdə müvafiq tədbirlər davam etdirilir.

EŞ-dən “Azərenerji” ASC-nin Mətbuat xidmətinə daxil olan məlumata görə, müəssisənin balans mənsubiyyətinə aid şəbəkələrdə həyata keçirilmiş yenidənqurma tədbirləri çərçivəsində ümumi uzunluğu 15,6 kilometrdən artıq olan 10 və 0,4 kV-lik EVX-lərdə müxtəlif təyinatlı təmir işləri aparılmışdır. Qeyd edək ki, elektrik enerjisi ilə təminatda dayanıqlığın daha da möhkəmləndirilməsi məqsədi ilə iki transformator məntəqəsində müxtəlif təyinatlı təmir işləri həyata keçirilmiş və eyni sayda transformatorda əsaslı təmir edilərək istifadəyə verilmişdir.

Mənbə onu da bildirdi ki, ötən ilin noyabr ayında müəssisə üzrə 1,7 milyon kilovatsaata yaxın elektrik enerjisi istehlak edilmişdir ki, bu da 2012-ci ilin eyni dövründəki istehlakdan 20,4 min kilovatsaat çoxdur. Ödənişdə isə 2012-ci ilin eyni dövründəki göstərici ilə müqayisədə dinamik artım qeydə alınmışdır. O cümlədən, daimi əhali istehlakçı qrupunda isə istehlak 2012-ci ilin müvafiq dövrü ilə müqayisədə 4 min kilovatsaata yaxın azalaraq 1,3 milyon kilovatsaata yaxın olmuşdur. Ödəniş də mütləq artmışdır. Ötən ilin 11 ayı ərzində istehlak 2012-ci ilin müvafiq dövrü ilə müqayisədə 818 min kilovatsaata yaxın azalaraq 15,1 milyon kilovatsaatdan artıq  olmuşdur. Ödəniş isə 2012-ci ilin eyni dövründəki göstərici ilə müqayisədə 12 faizdən çox mütləq artmışdır. O cümlədən, daimi əhali istehlakçı qrupu üzrə istehlak 2012-ci ilin müvafiq dövrü ilə müqayisədə 62 min  kilovatsaatdan çox artaraq 11,6 milyon kilovatsaatdan artıq olmuşdur. Ödənişdə isə mütləq artım 7 faizdən artıq olmuşdur.

“Xidmətin səviyyəsinin daha da yüksəldilməsi və enerji itkilərinin azaldılması istiqamətində də tədbirlər davam etdirilir”, – deyən mənbə onu da bildirdi ki, ötən ilin 11 ayı ərzində müəssisənin xidməti ərazisində keçirilmiş reydlər zamanı 100-dən çox istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 324,9 min  kilovatsaatdan artıq itirilmiş elektrik enerjisinin 19,5 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 16 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir. O cümlədən, ötən ilin noyabr ayında isə 11 qayda pozuntusu faktı aşkar olunmuşdur. Nəticədə 22,7 min kilovatsaatdan artıq itirilmiş elektrik enerjisinin 1,4 min manata yaxın istehlak dəyəri bərpa edilmişdir.