Cənub bölgəsinin elektrik enerjisinə olan tələbatının ödənilməsində mühüm rol oynayan “Şirvan Regional Elektrik Şəbəkəsi”ndə (REŞ) texniki  göstəricilərin daha da dayanıqlı vəziyyətdə fəaliyyətinin təmin edilməsi, o cümlədən qış mövsümünə hazırlıq məqsədilə müvafiq tədbirlər həyata keçirmişdir. Şəbəkədən ötən ilin  son üç ayı ərzində balans mənsubiyyətinə aid olan elektrik verilişi xətlərində və yarımstansiyalarda  görülmüş cari və əsaslı təmir işləri barəsində “Azərenerji” ASC-nin Mətbuat xidmətinə məlumat verilmişdir. Xidməti ərazilərdə olan istehlakçıların davamlı elektrik enerjisi ilə təminatı kollektivin ən ümdə tapşırıqlarından biridir. Bu məqsədlə 330 kV-lik III “Şirvan”, 220 kV-lik I  “Şirvan” və III “Masallı” elektrik verilişi xətlərində (EVX) ümumilikdə 8,5 km xətt əsaslı təmir edilmiş, 200-ə yaxın izolyator və 40-dan çox xətt armaturu yenisi ilə əvəz edilmiş, eyni zamanda 55 xətt armaturu quraşdırılmışdır. 110 kV-lik III-IV “Ələt”, I “Salyan”, I “Lənkəran” və digər daha 5 hava xətlərinin (HX) ümumilikdə 21 kilometrə yaxın hissəsi əsaslı təmir edilmiş, 310-dan artıq izolyator dəyişdirilmiş, 100-ə yaxın xətt armaturu quraşdırılmış və 14 dayaq təmir edilmişdir.

Qeyd edək ki, analoji təmir işləri 35 kV-lik EVX-lərdə də aparılmış və burada sözügedən dövr ərzində 27 kilometrə yaxın xətt əsaslı təmir edilmiş, 80-ə yaxın izolyator və 25-ə yaxın xətt armaturu yenisi ilə əvəz edilmişdir. Eyni zamanda 40-dan artıq xətt armaturu quraşdırılmışdır.

Mənbədən əldə etdiyimiz digər bir məlumata görə isə, hesabat dövründə 110 kV-lik “Masallı”,  “Neftçala”, “Boradigah” və digər bir neçə yarımstansiyalarda müxtəlif təyinatlı təmir işləri həyata keçirilmiş, o cümlədən hava xətlərinin yağ açarlarının yenisi ilə əvəz edilməsi işi həyata keçirilmişdir.

Onu da qeyd etmək yerinə düşərdi ki, müəssisənin balans mənsubiyyətinə aid olan “Cihazqayırma”, “762 saylı”, “IPZ”, “Lerik” və “Abdulabad” yarımstansiyalarında isə müxtəlif güclü transformatorlar təmir edilərək normal iş rejiminə gətirilmişdir. Yeri gəlmişkən, müəssisənin balans mənsubiyyətinə aid olan 110 kV-lik “Cənub” yarımstansiyasında 2 saylı 40 MVA transformator əsaslı təmir edilir.

Sonda onu da qeyd edək ki, 35 kV-lik və ondan yuxarı gərginlikli EVX və yarımstansiyalarda yanğın təhlükəsizliyinin təmin edilməsi məqsədilə sözügedən dövrdə yağtutumlu avadanlıqlara baxış keçirməklə aşkar edilmiş nasasızlıqlar aradan qaldırılmış, onların ətrafı çirkli yağ örtüyündən təmizlənmiş, eyni zamanda EVX-lərin mühafizə zonaları və yarımstansiyaların əraziləri yanğın törədə biləcək tullantılardan təmizlənmişdir.