İstehlakçıların daha da dayanıqlı elektrik enerjisi ilə təmin edilməsi, enerjinin ötürülməsi və paylanmasında itkilərin azaldılması məqsədi ilə nəzərdə tutulmuş işlər uğurla həyata keçirilmişdir. “Xızı Elektrik Şəbəkəsindən “Azərenerji” ASC-nin Mətbuat xidmətinə daxil olan məlumata görə, cari ilin son üç ayı ərzində burada müxtəlif təyinatlı yenidənqurma və təmir tikinti işləri yerinə yetirilmişdir. Belə ki, 10 və 0,4 kV-lik xətlərdə 60 dayaq və 110 travers quraşdırılmış, 12 km-ə yaxın yenisi ilə əvəz edilmiş, 2,3 km-ə yaxın SİP kabel xətti çəkilmişdir. Qeyd edək ki, yenidənqurma və təmir tikinti işləri zamanı 10 transformator məntəqəsində də müxtəlif təyinatlı təmir işləri həyata keçirilmişdir.

“Elektrik enerjisindən istifadə zamanı qaydaların pozulmasının qarşısının alınması istiqamətində xeyli işlər görülmüş və bu istiqamətdə tədbirlər davam etdirilir. Ümimiyyətlə, elektrik enerjisindən qeyri-qanuni istifadə edən istehlakçılara qarşı daha sərt tədbirlər görülür” – deyən mənbə onu da vurğuladı ki, müəssisənin xidməti ərazisində cari ilin noyabr ayında keçirilmiş reydlər zamanı 12 istehlakçının (bunun 11-i məişət abonenti (əhali) istehlakçı qrupuna aiddr) sayğac uçot komplektində qüsur aşkar edilərək 45,9 min kilovatsaatdan artıq (bunun 45,6 min kilovatsaata yaxını məişət abonenti (əhali) istehlakçı qrupuna aiddr) itirilmiş elektrik enerjisinin 2,8 min manata yaxın istehlak dəyəri bərpa edilmişdir. Onu da qeyd edək ki, burada cari ilin 11 ayı ərzində isə 295 qayda pozuntusu (bunun 281-i məişət abonenti (əhali) istehlakçı qrupuna aiddr) faktı aşkar olunmuş, 1 milyon 247,2 min kilovatsaatdan artıq (bunun 1 milyon 142 min kilovatsaatdan çoxu məişət abonenti (əhali) istehlakçı qrupuna aiddr) itirilmiş elektrik enerjisinin 74,8 min manatdan artıq istehlak dəyəri bərpa edilmişdir. Həyata keçirilmiş məqsədyönlü tədbirlər nəticəsində həmin bu məbləğin 55 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər görülür.

Mənbə onu da bildirdi ki, cari ilin noyabr ayında müəssisə üzrə 7 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövründəki istehlakdan 43 min kilovatsaat azdır. Ümumi ödəniş isə ötən ilin müvafiq dövründəki göstəricidən mütləq 15,2 faiz çoxdur. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 16 min kilovatsaata yaxın artaraq 836 min kilovatsaatdan artıq  olmuşdur.  Ödənişdə mütləq artım isə 6 faizə yaxın olmuşdur. Onu da qeyd etmək yerinə düşərdi ki, cari ilin 11 ayı ərzində müəssisə üşrə ümumi istehlak 75,6 milyon kilovatsaatdan çox olmuşdur. Nəticədə ötən ilin müvafiq dövrü ilə müqayisədə istehlak 7,1 milyon kilovatsaata yaxın artmış, ödənişdə mütləq artım isə 8 faizdən artıq olmuşdur. O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 665 min kilovatsaata yaxın artaraq 7,2 milyon kilovatsaatdan artıq olmuşdur. Ödənişdə mütləq artım isə 3 faizə yaxın olmuşdur.

Yeri gəlmişkən, burada yanğın təhlükəsizliyinin təmin edilməsi haqqında nəzərdə tutulan tədbirlər həyata keçirilir. O cümlədən, yağ tutumlu avadanlıqlarda yanğın təhlükəsizliyi təmin edilib, EVX-lərin mühafizə zonalarının və TM-lərin əraziləri quru otlardan və kənar əşyalardan, transformatorların özülü və gövdəsi çirkli yağ örtüyündən təmizlənib.