“Yevlax Elektrik Şəbəkəsi”nin kollektivi qışa hazırlıq məqsədilə ərazidə nəzərdə tutulan təmir işlərini bu il də uğurla başa çatdırıb. Enerji təchizatının dayanıqlığını təmin etmək üçün bir sıra işlər həyata keçirilib.

Sözügedən EŞ-dən “Azərenerji” ASC-nin Mətbuat xidmətinə daxil olan məlumata görə, 10 kV-lik II «Kənd» və «Cırdaxan», 6 kV-lik «Xanabad» və «Meyvəli» hava xətlərində 4 kilometr uzunluğunda elektrik verilişi xətlərdə əsaslı, 10 kV-lik «Quşçuluq» və «Nasos» EVX-lərdə, 6 kV-lik 54-cü və 13-cü fiderlərdə 14,9 kilometrə yaxın məsafədə təmir aparılıb. Əsaslı və cari təmir işləri zamanı 10 kV-lik 30 ədəd ağac dayaq yeni dəmir-beton dayaqla əvəz olunub. Abonentlər üçün 295 ədəd birfazlı yeni sayğac quraşdırılıb, 455 ədəd birfazlı sayğac isə də­yişdirilərək yenisi ilə əvəz edilib.

Elektrik şəbəkəsinin məsul işçisinin bildirdiyinə görə, 0,4 kV-lik xətlərdə də təmir işləri görülüb. Nəmərli, Quşçu, Xaldan, Qara­manlı, Yuxarı Qarxun, Nemət­abad kəndlərində və Aran qəsəbəsində 14,8 kilometrə yaxın uzunluqda 0,4 kV-lik elektrik verilişi xətləri cari təmirdən çıxarılıb, enerjinin dayanıqlığı və keyfiyyəti yüksəldilib. Bundan başqa, 26 ədəd 0,4 kV-lik dayaq dəyişdirilərək yeni dəmir-beton dayaqla əvəzlənib.

Bununla yanaşı, Yevlax şəhərində, Hacıselli, Gülövşə, Qa­ramanlı, Xanabad, Bünyadabad, Səmədabad, Kövər kəndlərində və digər kəndlərdə ümumilikdə 46 ədəd transformator yarımstansiyası cari təmir edilib.

Neqativ halları aradan qaldırmaq və şəffaflığı təmin etmək məqsədilə Xanabad, Qaraoğlan, Kövər, Ərəş və digər kəndlərdə həyət­lərdəki 217 ədəd  birfazlı elektrik sayğacları baxış üçün münasib yerlərə köçürülüb və quraşdırma işləri zamanı 6,5 kilometrdən çox kabel sərf edilib.

“Yevlax Elektrik Şəbəkəsi”nin kollektivi həmişə olduğu kimi, qarşıdan gələn bu əlamətdar bayramlarda da istehlakçılara daha da dayanıqlı və keyfiyyətli elektrik  enerjisinin verilməsini qarşılarına məqsəd qoyublar.