Digər bölgələr kimi, Siyəzən rayonunun sakinlərinin elektrik enerjisinə tələbatının normal səviyyədə təmin olunması  daim diqqət mərkəzindədir.

“Siyəzən Elektrik Şəbəkəsi”ndən “Azərenerji” ASC-nin Mətbuat xidmətinə daxil olan məlumata görə, rayonun paylayıcı şəbəkələrinin enerji təchizatı 970 kilometrə yaxın 10, 6 və 0,4 kV-lik EVX-lər və ümumi gücü 105 MVA-ya yaxın olan 390-dan artıq transformator vasitəsilə həyata keçirilir. Şəbəkənin mövsümə hazırlıq çərçivəsində nəzərdə tutulan bütün işlər plan-qrafikə uyğun olaraq yüksək səviyyədə icra olunur. Belə ki, cari ilin son üç ayında isə 10 və 6 kV-lik xətlərin 2,7 km-ə yaxın hissəsi yenilənmiş, 20 km-də təmir işləri aparılmış, 7 km-ə yaxın naqil tarımlanmış və budama işləri aparılmışdır. 0,4 kV-lik xətlərdə isə 4,7 km-ə yaxın naqil yenisi ilə əvəz edilmiş, 10 km-dən artıq hissədə təmir işləri aparılmış, 3 km-dən artıq naqil tarımlanmışdır. Eyni zamanda 20-dən artıq dayaq dəyişdirilmiş və xeyli sayda dayaq isə düzləndirilmişdir. Qeyd edək ki, sözügedən dövrdə balans mənsubiyyətinə aid olan 17 TM-də müxtəlif təyinatlı təmir işləri həyata keçirilmiş, 30-dan artıq transformator isə təmir edilmişdir.

“Üçot işinin düzgün təşkili ilə əlaqədar həyata keçirilmiş tədbirlər də ümumi vəziyyətə müsbət təsir göstərib. Artıq əvvəlki illərlə müqayisədə sərfiyyatın nisbətən sabitləşməsi həm verilən elektrik enerjisinin keyfiyyətinin yüksəlməsinə, həm də avadanlıqların istismar müddətinin uzanmasına səbəb olmuşdur”, – deyən mənbə onu da bildirdi ki,  müəssisə üzrə  cari ilin noyabr ayında 8,9 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 516 min kilovatsaata yaxın çoxdur. Ötən  ilin müvafiq dövrü ilə müqayisədə ödənişdə mütləq artım isə 21 faizdən artıq olmuşdur. O cümlədən, daimi əhali istehlakçı qrupu üzrə isə 3,7 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövründəki göstəricidən 342 min kilovatsaat çoxdur. Ödəniş isə ötən  ilin müvafiq dövrü ilə müqayisədə mütləq 15 faizə yaxın çoxdur. Yeri gəlmişkən, cari ilin 11 ayı ərzində isə 82,5 milyon kilovatsaatdan artıq  elektrik enerjisi istehlak edilmişdir. Nəticədə ötən ilin müvafiq dövrü ilə müqayisədə istehlak 932 min kilovatsaata yaxın azalmış, ödənişdə mütləq artım isə 2 faizə yaxın olmuşdur. O cümlədən, daimi əhali istehlakçı qrupunda isə istehlak 27,5 milyon kilovatsaatdan artıq olmuşdur ki, bu da ötən ilin müvafiq dövründəki istehlakdan 2,9 milyon kilovatsaat çoxdur. Ödənişdə mütləq artım isə 14 faizdən artıq olmuşdur. Sonda onu da qeyd edək ki, görülən bütün məqsədyönlü tədbirlər həm enerji itkisinin qarşısının alınmasında, həm istehlakın dəqiqləşdirilməsində, həm də ümumi ödənişin artmasında öz müsbət nəticəsini göstərməkdədir. Başlanan tədbirlərin növbəti rüblərdə də davam etdirilməsi nəzərdə tutulur.