Xidməti ərazilərində daha dayanıqlı elektrik enerjisi təminatının yaradılması məqsədilə “Sumqayıt Regional Elektrik Şəbəkəsi”nin (REŞ) balans mənsubiyyətinə daxil olan elektrik verilişi xətlərində (EVX) və yarımstansiyalarda bir sıra cari və əsaslı təmir işləri yerinə yetirilmişdir. Eyni zamanda REŞ-in əlaqələndirdiyi Elektrik Şəbəkələində (EŞ), o cümlədən “Qobustan” EŞ-in xidməti ərazisində də yenidənqurma işləri davam etdirilir.

Sözügedən EŞ-dən “Azərenerji” ASC-nin Mətbuat xidmətinə daxil olan məlumata görə tədbirlər planına uyğun olaraq, cari ilin son üç ayı ərzində 10 və 0,4 kV-lik xətlərdə aparılan yenidənqurma və təmir işləri zamanı 90 dan artıq dayaq basdırılmış, 145 travers quraşdırılmış, 23,1 km-ə yaxın naqil yenilənmiş, 2,4 km-dən artıq isə SİP kabel xətti çəkilmişdir. Eyni zamanda elektrik qurğularının quraşdırılması qaydalarına uyğun olaraq RLND tipli 3 ədəd xətt ayrıcısı da quraşdırılmışdır. Qeyd edək ki, sözügedən dövrdə müəssisənin xidməti ərazisində 13 TM-də müxtəlif təyinatlı təmir işləri həyata keçirilmiş, bir transformator təmir olunmuş, ümumi gücü 1400 kVA olan iki yeni transformator da quraşdırılaraq istismara verilmişdir.

Mənbədən əldə edilən digər bir məlumata  görə isə, cari ilin noyabr ayında müəssisənin xidmət ərazisində 1,8 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 159 min kilovatsaata yaxın azdır. Ümumi ödəniş isə ötən ilin müvafiq dövründəki göstərici ilə müqayisədə mütləq 15 faizə yaxın artmışdır. O cümlədən, ötən ilin müvafiq dövrü ilə müqayisədə daimi əhali istehlakçı qrupu üzrə istehlak 175 min kilovatsaatdan çox azalmış, ödənişdə mütləq artım 15 faizə yaxın olmuşdur. Onu da qeyd edək ki, cari ilin noyabr ayında daimi əhali istehlakçı qrupu üzrə istehlak 1,3 milyon kilovatsaatdan artıq olmuşdur. Onu da qeyd etmək yerinə düşərdi ki, cari ilin 11 ayı ərzində müəssisə üzrə istehlak ötən ilin müvafiq dövrü ilə müqayisədə 1,6 milyon kilovatsaata yaxın artararaq 17.2 milyon  kilovatsaata yaxın olmuşdur. Nəticədə ötən ilin müvafiq dövrü ilə müqayisədə ödəniş 5 faizə yaxın mütləq artmışdır. O cümlədən, daimi əhali istehlakçı qrupu üzrə isə istehlak ötən ilin müvafiq dövrü ilə müqayisədə 987 min kilovatsaata yaxın artaraq 12,3 milyon kilovatsaata yaxın olmuşdur. Ödəniş isə ötən ilin müvafiq dövrü ilə müqayisədə mütləq 1,4 faiz  artmışdır.

Mənbə onu da bildirdi ki, cari ilin noyabr ayında müəssisənin xidməti ərazisində keçirilmiş reydlər zamanı 15 istehlakçının (bu məişət abonenti (əhali) istehlakçı qrupuna aiddr) sayğac uçot komplektində qüsur aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 16,5 min  kilovatsaatdan artıq itirilmiş elektrik enerjisinin 990 manatdan çox istehlak dəyəri bərpa edilmişdir. Sonda onu da qeyd edək ki, cari ilin 11 ayı ərzində burada keçirilmiş reydlər zamanı aşkar edilmiş 140-dan artıq (bunun 120-ə yaxını məişət abonenti (əhali) istehlakçı qrupuna aiddr) qayda pozuntusuna görə 152,4 min kilovatsaatdan artıq (bunun 126,3 min kilovatsaatdan çoxu məişət abonenti (əhali) istehlakçı qrupuna aiddr) itirilmiş elektrik enerjisinin 9,1 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 65 faizdən çox hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.