Əhalinin elektrik enerjisi təchizatının yaxşılaşdırılması ilə bağlı bölgələrdə ardıcıl və məqsədyönlü tədbirlər görülməkdədir. “Balakən Elektrik Şəbəkəsi” rayon ərazisində elektrik enerjisinin daha da dayanıqlı və keyfiyyətli paylanması, satışa ötürülən enerjinin istehlak dəyərinin ödənilməsi istiqamətində fəaliyyətini uğurla davam etdirir.

Sözügedən şəbəkədən “Azərenerji” ASC-nin Mətbuat xidmətinə daxil olan məlumata görə,  müəssisənin xidməti ərazisində elektrik enerjisi ilə təminatı daha da yaxşılaşdırmaq, həmişə olduğu kimi bu qış mövsümündə də istehlakçıların elektrik enerjisi ilə fasiləsiz təchizatını təmin etmək məqsədi ilə mühüm işlər görülmüşdür. Belə ki, son üç ayı ərzində 10-0,4 kV-lik elektrik verilişi xətlərində 2,2 kilomer təmir işləri görülmüşdür. Buraya 10 kV-lik “Qabaqçöl”, “Mazımqaray”, rayonun Şərif, Hənifə, İtitala və digər kəndlərdə olan 0,4 kV-lik xətlər daxildir. Eyni zamanda sözügedən dövrdə müəssisənin balans mənsubiyyətinə aid olan 40 transformator məntəqəsində də müxtəlif təyinatlı təmir işləri həyata keçirilmişdir. Ümumiyyətlə, rayonun enerji təsərrüfatında həyata keçirilən tədbirlər nəticəsində enerji təchizatı daha da möhkəmləndirmişdir.

Qeyd edək ki, burada da əməyin mühafizəsi məsələləri də diqqət mərkəzindədir. İşçilərin peşəkarlıq səviyyələrinin yüksəldilməsinə daim diqqət yetirilir. Bunun üçün mütəmadi olaraq qəza məşqləri, müxtəlif treninqlər keçirilir. Əməyin mühafizəsi və texniki təhlükəsizlik məsələləri də arzuolunan səviyyədədir. İşçilər bu istiqamətdə mütəmadi olaraq təlimatlandırılırlar.

“Həyata keçirilmiş və hazırda davam etdirilən işlər paylayıcı şəbəkənin daha da səmərəli və dayanıqlı işləməsinə imkan verəcəkdir” – deyən mənbə onu da qeyd etdi ki, cari ilin noyabr ayında müəssisə üzrə 3,8 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövründəki istehlakla müqayisədə 217 min kilovatsaat azdır.  Ödəniş isə ötən ilin eyni dövründəki göstəricidən mütləq 12 faiz çoxdur. O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 356 min kilovatsaata yaxın azalaraq 2,4 milyon kilovatsaatdan artıq olmuşdur. Ödənişdə mütləq artım isə 8 faizdən çox olmuşdur. Mənbə onu da bildirdi ki, cari ilin 11 ayı ərzində ümumi istehlak ötən ilin müvafiq dövründəki istehlakla müqayisədə 569 min kilovatsaat artaraq 39 milyon kilovatsaatdan çox olmuşdur. Ötən ilin müvafiq dövrünə nisbətən cari ilin 11 ayı ərzində istehlak edilmiş elektrik enerjisinə  görə ümumi ödəniş mütləq 11 faizə yaxın artmışdır. O cümlədən, daimi əhali istehlakçı qrupunda isə istehlak 23,9 milyon kilovatsaatdan artıq olmuşdur ki, bu da ötən ilin müvafiq dövründəki istehlakdan 1.6 milyon kilovatsaat azdır. Ödənişdə mütləq artım isə 6 faizdən artıqdır.

Mənbədən əldə edilən digər bir məlumata görə, cari ilin 11 ayı ərzində müəssisənin xidməti ərazisində keçirilmiş reydlər zamanı 330 qayda pozuntusu faktı aşkar edilərək 1 milyon 306,3 min kilovatsaata yaxın itirilmiş elektrik enerjisinin 78,4 min manata yaxın istehlak dəyəri bərpa edilmişdir. Hesabat dövrü ərzində həmin bu məbləğin 72 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir. Yeri gəlmişkən, cari ilin noyabr ayında isə istehlakçıların elektrik enerjisindən istifadə qaydalarına riayət etmələrinin yoxlanılması ilə bağlı keçirilmiş reydlər zamanı 40-a yaxın istehlakçının sayğac uçot komplektində qüsur aşkar edilərək 46,3 min kilovatsaatdan artıq itirilmiş elektrik enerjisinin 2,8 min manata yaxın istehlak dəyəri bərpa edilmişdir.

Qayda pozuntularının təsnifatı və istehlakçı qrupu barədə əldə etdiyimiz məlumata istinadən bildirək ki,  elektrik enerjisindən yenə də kənar xətt vasitəsilə istifadə edilməsi halı üstünlük təşkil etmiş və ən çox qayda pozuntusu  məişət abonenti (əhali) istehlakçı qrupunda aşkar edilmişdir.