İstehlakçıların dayanıqlı və keyfiyyətli elektrik enerjisi ilə təmin edilməsi, həmçinin itkilərin azaldılması məqsədilə müxtəlif gərginlikli paylayıcı və ötürücü qurğularda əsaslı və cari təmir işlərinin yerinə yetirilməsi, energetiklərin  ən mühüm vəzifələrindən biridir. Şəbəkələrin mövsümə hazırlanması ilə bağlı həyata keçirilmiş məqsədyönlü tədbirlər nəticəsində mövcud iqlim şəraitində xoşagəlməz hadisələr baş verməmişdir. İstehlakçıların elektrik enerjisi təchizatında daha da yüksək kəmiyyət və keyfiyyət dəyişikliyinə nail olunmuşdur.

“Goranboy Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumata görə, cari ilin son üç ayı ərzində müəssisənin balans mənsubiyyətinə aid olan 10 kV-lik “Ağamalıoğlu”, “Xınalı”, “Qazanbulaq” və s. xəttlərdə, həmçinin Xanqərvənd, Balakürd, Yolqullar və digər kəndlərdə və rayon mərkəzində olan 0,4 kV-lik paylayıcı şəbəkələrdə həyata keçirilmiş müxtəlif təyinatlı təmir zamanı xətlərin ümumilikdə 1,2 km-i yeni naqillə əvəzlənmiş, 20-dən artıq dayaq dəyişdirilmiş və 30-a yaxın travers quraşdırılmışdır. Eyni zamanda 550 metr SİP kabel xətti çəkilmiş, 28,2 km-dən artıq xəttdə isə təmir işləri həyata keçirilmişdir. Paralel olaraq 10 və 0,4 kV-lik xətlərdə dayaqlar düzləndirilmiş, naqillərin qabariti bərpa olunmuş və trassası yaşıl kütlədən təmizlənmişdir.

Mənbəyə istinadən qeyd edək ki, sözügedən dövrdə müəssisənin balans mənsubiyyətinə aid olan 60-dan artıq  TM-də əsaslı və cari təmir işləri aparılmışdır və iki transformatorda təmir edilərək təkrar şəbəkəyə qoşulmuşdur.

Mənbədən əldə edilən digər məlumata görə, cari ilin noyabr ayında müəssisənin xidməti ərazisində keçirilmiş reydlər zamanı 70-dən çox qayda pozuntusu (bundan 36-ı məişət abonenti (əhali) istehlakçılar qrupuna aiddir) faktı aşkar olunmuş, 592,5 min kilovatsaatdan artıq (bunun 93,5 min kilovatsaata yaxını məişət abonenti (əhali) istehlakçılar qrupuna aiddir) itirilmiş elektrik enerjisinin 35,6 min manata yaxın istehlak dəyəri bərpa edilmişdir. Onu da qeyd etmək yerinə düşərdi ki, cari ilin 11 ayı ərzində keçirilmiş reydlər zamanı isə 525-dən çox istehlakçının (bundan 323-i məişət abonenti (əhali) istehlakçılar qrupuna aiddir) sayğac uçot komplektində qüsur aşkar edilərək 4 milyon 184,1 min kilovatsaata yaxın (bunun 1 milyon 27,6 min kilovatsaatdan çoxu məişət abonenti (əhali) istehlakçılar qrupuna aiddir) itirilmiş elektrik enerjisinin 251 min manatdan çox istehlak dəyəri bərpa edilmişdir. Həyata keçirilmiş məqsədyönlü tədbirlər nəticəsində həmin bu məbləğlə yanaşı ötən ildən aktlara görə yaranmış debitor borcunda müəyyən hissəsinin ödənişi təmin edilmiş və debitor borcun qalan hissənin ödənilməsi istiqamətində isə müvafiq tədbirlər görülür. Onu da qeyd etmək yerinə düşərdi ki, müəssisə üzrə cari ilin noyabr ayında ümumilikdə 18,9 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 1,9 milyon kilovatsaat çoxdur. O cümlədən, daimi əhali istehlakçı qrupunda isə 4,4 milyon kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 776 min kilovatsaatdan çox artmış, ödənişdə mütləq artım isə 2 faiz olmuşdur.

Yeri gəlmişkən, cari ilin 11 ayı ərzində isə ümumi istehlak ötən ilin müvafiq dövrü ilə müqayisədə 9.3 milyon kilovatsaata yaxın artaraq 197,6 milyon kilovatsaata yaxın olmuşdur. Ödənişdə mütləq artım isə 6 faizdən artıq olmuşdur. O cümlədən, daimi əhali istehlakçı qrupunda isə istehlak 37,3 milyon kilovatsaata yaxın olmuşdur. Nətəcədə ötən ilin müvafiq dövrü ilə müqayisədə istehlak 4,7 milyon kilovatsaata yaxın azalmış, ödəniş isə mütləq 5 faizə yaxın artmışdır.