Digər enerji obyektlərində olduğu kimi ən müasir texnologiyaların tətbiqi ilə tikilərək istifadəyə verilmiş “Bakı” elektrik stansiyasında da cari ilin 11 ayı ərzində aqreqatlara növbəti planlı istismar həddinə uyğun texniki xidmət göstərilmişdir. Stansiya işə başladığı gündən dispetçer qrafikinə uyğun olaraq normal iş şəraitində fəaliyyət göstərir

Elektrik stansiyasından  “Azərenerji” ASC-nin Mətbuat xidmətinə daxil olan məlumata görə, stansiyada cari ilin noyabr ayında 43,5 milyon kilovatsaata yaxın elektrik enerjisi istehsal edilmişdir. Cari ilin 11 ayı ərzində isə bu rəqəm 471,4 milyon kilovatsaatdan cox olmuşdur.

Onu da qeyd edək ki, avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsi və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində elektrik enerji istehsalı üzrə digər texniki göstəricilərdə də müsbət nailiyyətlər əldə edilmişdir.

Mənbədən əldə etdiyimiz digər bir məlumatda o da bildirilir ki, cari ilin son üç ayı ərzində stansiyada müxtəlif tətinatlı təmir işləri həyata keçirilmiş, o cümələdən istismar həddinə uyğun olaraq 10 porşen tipli aqreqata növbəti texniki qulluq da göstərilmişdir. Yeri gəlmişkən, tələbatçılara keyfiyyətli və dayanıqlı elektrik enerjisinin ötürülməsində, proqnozların uğurla yerinə yetirilməsində stansiya kollektivi səylə çalışır, aqreqatlarda aparılan texniki xidmət işlərində də fəal iştirak edirlər. Təmir işləri də stansiyanın təmir briqadası tərəfindən aparılır.

Məlumat verildiyi kimi, stansiyanın elektrik avadanlıqlarına baxış keçirilmiş və 110 kV-lik yarımstansiyanın avadanlıqlarında cari təmir işləri görülmüşdür. Digər enerji obyektlərində olduğu kimi burada da yanğın təhlükəsizliyi məsələsi daima diqqət mərkəzində saxlanılır. Stansiyanın və maşın zalının ətrafı yağ məhsullarından,  ərazi yanğın törədə biləcək tullantılardan təmizlənmişdir.       Xatırladaq ki, ümumi gücü  105 MVt olan “Bakı” elektrik stansiyası 12 aqreqatdan ibarətdir.