Xidməti ərazilərində daha da dayanıqlı elektrik enerjisi təminatının yaradılması məqsədilə “İmişli Regional Elektrik Şəbəkəsi”nin (REŞ) balans mənsubiyyətinə daxil olan elektrik verilişi xətlərində (EVX) və yarımstansiyalarda son aylar ərzində bir sıra sistem əhəmiyyətli təmir-bərpa işləri yerinə yetirilmişdir. Ümumiyyətlə, mövsümə hazırlıqla əlaqədar olaraq tədbirlər planı yerinə yetirilib. Tədbirlər planına uyğun olaraq, cari ilin son üç ayı ərzində  35 kV-lik “Qara Nuru” yarımstansiyasından çıxan 10 kV-lik “Məmmədabad”, “Dəyirman”;  “Saatlı” yarımstansiyasından çıxan 10 kV-lik “Moskva”, “Məntəqə” və digər dörd yarımstansiyadan çıxan 10 və 6 kV-lik 8 hava elektrik verilişi xətlərində əsaslı və cari təmir işləri uğurla başa çatmışdır. “Saatlı” elektrik şəbəkəsindən “Azərenerji” ASC-nin Mətbuat xidmətinə daxil olan məlumatda  belə deyilir.

Sözügedən dövrdə rayonun Dədə Qorqud,  Məzrəli, Mircəlalkənd və digər 11 kəndlərində 0,4 kV-lik enerji daşıyıcılarında da müvafiq təmir-bərpa işlər yerinə yetirilib, o cümlədən xətlərin 5,4 km-i təmir edilmişdir. Yeri gəlmişkən, sözügedən dövrdə 10 və 6 KV-lik xətlərin isə 3,7 km-ə yaxın hissəsi təmir edilmişdir. Qeyd edək ki, cari ilin son üç ayı ərzində balans mənsubiyyətinə aid olan müxtəlif güclü 45 transformator əsaslı və cari təmir edilərək istehlakçıların istifadəsinə verilmişdir.

Mənbə onu da bildirdi ki, cari ilin noyabr ayında müəssisənin xidməti ərazisində keçirilmiş reydlər zamanı 400 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılaraq 868,1 min kilovatsaata yaxın itirilmiş elektrik enerjisinin 52 min manatdan artıq istehlak dəyəri bərpa edilmişdir. Məlumat verildiyi kimi, cari ilin 11 ayı ərzində isə burada 1550-dən artıq istehlakçının sayğac uçot komplektində pozuntu faktı aşkar edilmişdir. Aşkar edilmiş qayda pozuntularına görə 5 milyon 309,9 min kilovatsaatdan artıq itirilmiş elektrik enerjisinin 318,6 min manata yaxın istehlak dəyəri bərpa edilmişdir. Həyata keçirilmiş müvafiq tədbirlər nəticəsində həmin bu məbləğin 15 faizə yaxın hissəsinin ödənişi təmin edilmiş və qalan hissənin ödənilməsi üçün tədbirlər davam etdirilir.

Mənbədən əldə edilən digər bir məlumata görə, cari ilin noyabr ayında müəssisənin xidmət ərazisində 8,4 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 211,4 min kilovatsaat çoxdur. O cümlədən, daimi əhali istehlakçı qrupu tərəfindən istehlak 6,6 milyon kilovatsaata yaxın olmuşdur ki, bu da ötən ilin eyni dövründəki istehlakdan 324 min kilovatsaata yaxın çoxdur. Cari ilin 11 ayı ərzində müəssisə üzrə istehlak ötən ilin eyni dövründəki istehlakla müqayisədə 8,9 milyon kilovatsaata yaxın artaraq 80,7 milyon kilovatsaata yaxın olmuş, ödənişdə mütləq artım da qeydə alınmışdır.  O cümlədən, daimi əhali istehlakçı qrupu üzrə istehlak 61,1 milyon kilovatsaata yaxın olmuşdur ki, bu da ötən ilin müvafiq dövründəki istehlakdan 10,9 milyon kilovatsaata yaxın çoxdur. Ödəniş isə ötən ilin eyni dövründəki göstəricidən mütləq artmışdır.