Mövsümə hazırlıq çərçivəsində “Ağcabədi Elektrik Şəbəkəsi”ndə də bir sıra mühüm işlər həyata keçirilmişdir. Sözügedən müəssisədən “Azərenerji” ASC-nin Mətbuat xidmətinə daxil olan məlumata görə,  cari ilin son üç ayı ərzində balans mənsubiyyətinə aid olan 10 kV-lik “Qaraxanlı”, “Qaravəlli”, “Sarcalı”, “Saybalı” və digər hava xəttlərinin ümumilikdə 6 kilometrdən artıq hissəsində müxtəlif təyinatlı təmir işləri həyata keçirilmişdir. Eyni zamanda rayonun Köyük, Şahsevən, Hacıbədəli və digər 12 kəndində, Ağcabədi şəhər ərazisində yerləşən 0,4 kV-lik xətlərin isə ümumilikdə 5,4 km-dən artıq hissəsi təmir edilmişdir. Qeyd edək ki,  sözügedən dövrdə müəssisənin balans mənsubiyyətinə aid olan transformatorların 34-ü təmir edilərək istehlakçıların istifadəsinə verilmişdir.

Mənbədən onu da bildirdilər ki, 110 kilovoltluq "Ağcabədi" yarımstansiyasındakı 110 kV-lik yağ açarının müasir tipli eleqaz açarı ilə dəyişdirilməsi nəzərdə tutulur.

Bundan başqa, şəbəkənin tamamilə yeniləşdirilməsi istiqamətində də məqsədyönlü tədbirlərin həyata keçirilməsi, o cümlədən SİP kabelin çəkilməsi və smart-kart tipli sayğacın quraşdırılması nəzərdə tutulur. Bu eyni zamanda elektrik enerjisindən qeyri-qanuni istifadə hallarının qarşısının alınmasında da rol oynayır. Ümumiyyətlə isə rayonda elektrik enerjisindən qeyri-qanuni istifadə edən istehlakçılara qarşı sərt tədbirlər görülür. Təbliğat işinin  normal səviyyədə qurulmasına da ciddi diqqət yetirilir. Görülən tədbirlər elektrik enerjisindən daha çox istifadə olunduğu qış aylarlnda qeyri-qanuni müdaxilələrin qarşısının alınmasına təsirsiz ötüşməyəcək. Bu da öz növbəsində sərfiyyatın müəyyən qədər azalmasına səbəb ola bilər.  Nəticədə istismar zamanı istifadə olunan avadanlıqlarda baş verə biləcək qəza halları minimum səviyyəyə enəcəkdir.

Mənbəyə istinadən qeyd edək ki, cari ilin noyabr ayında müəssisənin xidməti ərazisində keçirilmiş reydlər zamanı 860-dan artıq istehlakçının sayğac uçot komplektində pozuntu faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 2 milyon 230,5 min  kilovatsaatdan artıq itirilmiş elektrik enerjisinin 133,8 min manatdan çox istehlak dəyəri bərpa edilmişdir. Onu da qeyd etmək yerinə düşərdi ki, cari ilin 11 ayı ərzində müəssisənin xidməti ərazisində keçirilmiş reydlər zamanı 2190-a yaxın qayda pozuntusu faktı aşkar edilərək 13 milyon 800,8 min kilovatsaatdan artıq itirilmiş elektrik enerjisinin 828,1 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 37 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Məlumat verildiyi kimi, cari ilin noyabr ayında müəssisə üzrə 23,8 milyon kilovatsaata yaxın elektrik enerjisi istehlak edilmişdir. Bu da ötən ilin müvafiq dövründəki istehlakla müqayisədə 1,1 milyon kilovatsaata yaxın çoxdur.  O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 1,6 milyon kilovatsaatdan çox artaraq 4,7 milyon kilovatsaata yaxın olmuşdur. Yeri gəlmişkən, cari ilin 11 ayı ərzində müəssisə üzrə istehlak ötən ilin müvafiq dövrü ilə müqayisədə 3,9 milyon kilovatsaata yaxın artaraq 260,6 milyon kilovatsaatdan artıq olmuşdur. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 911 min  kilovatsaata yaxın artaraq 36,4 milyon kilovatsaata yaxın olmuşdur.

Sonda onu da qeyd edək ki, yenidənqurma və təmir işləri növbəti aylarda da davam etdiriləcəkdir.