Payız-qış mövsümünə hazırlıq çərçivəsində “Cəlilabad Elektrik Şəbəkəsi”ndə bir sıra mühüm işlər həyata keçirilib.

Sözügedən şəbəkədən “Azərenerji” ASC-nin Mətbuat xidmətinə daxil olan məlumata görə,  cari ilin son üç ayı ərzində müəssisənin balans mənsubiyyətinə aid olan 10 kV-lik EVX-lərin 6 km-ə yaxın hissəsi yenidən qurulmuş, 10 və 0,4 kV-lik EVX-lərin 5,9 km-dən artıq hissəsində isə əsaslı təmir işləri aparılmışdır.  Eyni zamanda smartkart tipli sayğacların quraşdırılması məqsədilə sayğacların giriş xəttinə 800 metrə yaxın koaksial kabel çəkilmiş, 3,4 km-dən artıq 0,4 kV-lik xətt isə SİP kabellə əvəzlənmişdir. Bütün bunlarla yanaşı, sözügedən dövrdə müəssisənin balans mənsubiyyətinə aid olan TM-lərin 9-da müxtəlif təyinatlı təmir işləri həyata keçirilmiş və müxtəlif gücdə dörd transformator da əsaslı təmir edilərk istehlakçıların istifadəsinə verilmişdir. Qeyd edək ki, həmin bu dövrdə müəssisənin xidməti ərazisində bir TM-də quraşdırılaraq istismara verilmişdir.

Məlumatda o da bildirilir ki, həyata keçirilən tədbirlər nəticəsində müəssisənin texniki iqtisadi göstəricilərində müsbət dinamika müşahidə edilmişdir. Belə ki, cari ilin oktyabr ayında rayon üzrə elektrik enerjisi istehlakı 245 min kilovatsaata yaxın artaraq 8,8 milyon kilovatsaata yaxın olmuşdur. İstehlak edilmiş elektrik enerjisinin dəyərinin ödənişi isə ötən ilin eyni dövrü ilə müqayisədə mütləq 8 faizdən çox artmışdır. O cümlədən daimi əhali istehlakçı qrupuinda isə istehlak ötən ilin müvafiq dövrü ilə müqayisədə 0,5 faiz artaraq 6,8 milyon kilovatsaatdan artıq olmuşdur. Ödənişdə mütləq artım isə 5 faizdən çox olmuşdur. Yeri gəlmişkən, cari ilin 10 ayı ərzində isə ümumilikdə 92,3 milyon kilovatsaatdan artıq elektrik enerjisi istehlak edilmişdir ki, bu da ötən ilin müvafiq dövründəki istehlakdan 321 min kilovatsaat çoxdur. Ödəniş isə ötən ilin müvafiq dövründəki göstəricidən mütləq 12 faizə yaxın çoxdur. O cümlədən, daimi əhali istehlakçı qrupunda isə istehlak ötən ilin müvafiq dövründəki istehlakla müqayisədə 2 faizə yaxın azalaraq 71,9 milyon kilovatsaata yaxın olmuşdur. Ödənişdə mütləq artım isə 14 faizə yaxın olmuşdur            “Rayonda elektrik enerjisindən qeyri-qanuni istifadə edən abonentlərə qarşı sərt tədbirlər görülür. Təbliğat işinin  normal səviyyədə qurulmasına da ciddi diqqət yetirilir. Görülən tədbirlər elektrik enerjisindən daha çox istifadə olunduğu qış aylarında qeyri-qanuni müdaxilələrin qarşısının alınmasına təsirsiz ötüşməyəcək. Bu da öz növbəsində sərfiyyatın müəyyən qədər azalmasına səbəb ola bilər.  Nəticədə istismar zamanı istifadə olunan avadanlıqlarda baş verə biləcək qəza halları minimum səviyyəyə endiriləcəkdir”, – deyən mənbə onu da qeyd etdi ki, cari ilin oktyabr ayında müəssisənin xidməti ərazisində istehlakçıların elektrik enerjisindən istifadə qaydalarına riayət etmələrinin yoxlanılması ilə bağlı keçirilmiş reydlər zamanı 50 istehlakçının sayğac uçot komplektində qüsur aşkar edilərək 104,5 min kilovatsaata yaxın itirilmiş elektrik enerjisinin 6,3 min manata yaxın istehlak dəyəri bərpa edilmişdir. Onu da qeyd etmək yerinə düşərdi ki, cari ilin 10 ayı ərzində müəssisə üzrə 540-dan artıq qayda pozuntusu aşkar edilərək 2 milyon 213,6 min kilovatsaata yaxın itirilmiş elektrik enerjisinin 132,8 min manatdan artıq istehlak dəyəri bərpa edilmişdir. Hesabat dövrü ərzində həmin bu məbləğin 77 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.