Bütün enerji obyektlərində olduğu kimi “İmişli Regional Elektrik Şəbəkəsi”nin də xidməti ərazisində yerləşən bütün yarımstansiyalarda, transformator məntəqələrində o cümlədən, komplekt transformator məntəqələrində və elektrikötürücü xətlərdə payız-qış mövsümünə hazırlıq işləri başa çatmışdır. Avadanlıqların iş səmərəliliyinin artırılması məqsədilə bir sıra əsaslı təmir və texniki təftiş işləri aparılmış, enerjinin ötürülməsi və paylaşdırılması sistemlərinin sabit və dayanıqlı işləməsi, istismar səviyyəsinin  yüksəldilməsi istiqamətində bir sıra tədbirlər həyata keçirilmişdir. O cümlədən, cari ilin son üç ayı ərzində 330 kV-lik “İmişli” yarımstansiyasının genişləndirilməsi ilə əlaqədar eyni gərginlikli VI “Goranboy” HX-nin yuvasının tikintisi işləri aparılır. Hazırda bu HX-nin eleqaz açarının və kabel kanalları quraşdırılır.

Sözügedən müəssisədən həmin bu dövrdə görülmüş işlər barəsində “Azərenerji” ASC-nin Mətbuat xidmətinə daxil olan məlumata  görə, 110 kV-lik “Bəhrəmtəpə” yarımstansiyasında genişləndirmə işləri ilə əlaqədar olaraq, yeni quraşdırılmış avadanlıqların normal iş fəaliyyətinin bərpa edilməsi məqsədilə akkumlyator batareyaları və ikinci kommutasiya dövrələrində kabellər quraşdırılmışdır. Eyni zamanda 110 kV-lik “Yeni Biləsuvar” və “Böyük Harami” yarımstansiyalarında da yenidənqurma işləri həyata keçirilmişdir.

Qeyd edək ki,  sözügedən dövrdə təmir qrafikinə uyğun olaraq 110 kV-lik “Ağcabədi” yarımstansiyasında 1 saylı 40 MVA-lıq, “Cavad” yarımstansiyasında 1 saylı 10 MVA-lıq, “Saatlı Dartı” yarımstansiyasında isə 2 saylı 20 MVA-lıq transformatorlar təmir edilmişdir. Eyni zamanda “Saatlı Dartı” yarımstansiyasında 1 və 2 saylı transformatorların 110 kV-lik girişlərində eleqaz açarlar quraşdırılaraq yarımstansiyanın dayanıqlı iş rejimi daha da möhkəmləndirilmişdir. Onu da qeyd edək ki, sözügedən dövrdə müəssisənin balans mənsubiyyətinə aid olan yarımstansiyalarda yuxarıda qeyd edilənlərlə yanaşı, digər transformatorlar cari  təmir olunmuş, yarımstansiyalardakı elektrik avadanlıqlarında müxtəlif təyinatlı təmir işləri həyata keçirilmişdir. Yeri gəlmişkən, cari ilin son üç ayı ərzində müəssisənin xidməti ərazisində olan elektrik şəbəkələrinin balansında olan transformatorların 125-dən çoxu təmir edilərək istehlakçıların istifadəsinə verilmişdir.

“Enerjinin ötürülməsi sistemlərinin sabit işləməsi və istismar səviyyəsinin  yüksəldilməsi istiqamətində bir sıra tədbirlər həyata keçirilmişdir”, – deyən mənbə əlavə etdi ki, sistemtəşkiledici 330 kV-lik III “Şirvan” hava xəttində (HX) 140-a yaxın izolyator yenisi ilə əvəz edilmişdir. Eyni zamanda dayaqların ətrafı və xəttin trassası yaşıl kütlələrdən təmizlənmişdir. Analoji işlər “Parsabad”, I-II “Kürdəmir”, “Xalac-Qozluçay”, “İmişli-Ağsabədi” və digər  HX-lərdə də həyata keçirilmişdir.

Mənbə onu da bildirdi ki, digər enerji obyektləri kimi, burada da yanğın təhlükəsizliyi tədbirləri daim diqqət mərkəzindədir. Mütəmadi qabaqlayıcı tədbirlər həyata keçirilir. Eyni zamanda EVX-lərin mühafizə zonaları və yarımstansiyaların əraziləri quru otlardan, yağ tutumlu avadanlıqların ətrafı çirkli yağ örtüyündən təmizlənmiş, mühafizə avadanlıqlarının nəzarət və ölçü cihazları təftiş edilmiş və aşkar edilmiş qüsurlar aradan qaldırılmışdır.

Mənbənin verdiyi məlumata əsasən, sadalanan tədbirlərin yerinə yetirilməsi enerji təsərrüfatlarının daha da dayanıqlı fəaliyyətinə zəmanət verən əsas amillərdəndir. Bunu nəzərə alaraq Şəbəkədən yenidənqurma işlərinin davam etdirilməsinin gündəlikdə duran əsas tapşırıqlardan biri olduğu bildirildi.