İstehlakçıların dayanıqlı və keyfiyyətli elektrik enerjisi ilə təmin edilməsi və itkilərin azaldılması məqsədilə müxtəlif gərginlikli paylayıcı və ötürücü qurğularda əsaslı və cari təmir işlərinin yerinə yetirilməsi energetiklərin  ən mühüm vəzifələrindəndir. Şəbəkələrin mövsümə hazırlanması ilə bağlı həyata keçirilmiş məqsədyönlü tədbirlər nəticəsində mövcud iqlim şəraitində xoşagəlməz hadisələr baş verməmişdir. İstehlakçıların daha da yaxşı elektrik enerjisi təchizatında kəmiyyət və keyfiyyət dəyişikliyinə nail olunmuşdur.

“Salyan Elektrik Şəbəkəsi”ndə “Azərenerji” ASC-nin Mətbuat xidmətinə verilən məlumata əsasən, şəbəkədə yenidənqurma, əsaslı və cari təmir işləri davam etdirilir. Cari ilin son üç ayı ərzində isə burada 1,4 km uzunluğunda yeni 6 kV-lik EVX çəkilmişdir.  Eyni zamanda 4,4 kilometrə yaxın 6 və 10 kV-lik, 13,6 kilometrdən çox 0,4 kV-lik xətlərdə əsaslı təmir işləri görülmüşdür. Qeyd edək ki, sözügedən dövrdə müəssisənin xidməti ərazisində 400 kVA gücündə bir   TM istismara verilmiş, 160-a yaxın TM-də müxtəlif təyinatlı təmir işləri həyata keçirilmiş, ümumi gücü 2 MVA-dan artıq olan 9 transformator isə təmir edilərək işlək vəziyyətə gətirilmişdir.

Mənbə onu da bildirdi ki, ötən ilin müvafiq dövrünə nisbətən cari ilin oktyabr ayında rayon üzrə elektrik enerjisi istehlakı 493 min kilovatsaata yaxın artaraq 20,8 milyon kilovatsaata yaxın olmuşdur. İstehlak edilmiş elektrik enerjisinin dəyərinin ödənişi isə ötən ilin eyni dövrü ilə müqayisədə mütləq 4 faizə yaxın artmışdır. O cümlədən daimi əhali istehlakçı qrupunda isə istehlak ötən ilin müvafiq dövrü ilə müqayisədə 610 min kilovatsaat azalaraq 5 milyon kilovatsaatdan artıq olmuşdur. Ödənişdə mütləq artım isə 4 faizə yaxın olmuşdur. Yeri gəlmişkən, cari ilin 10 ərzində isə ümumilikdə 235 milyon kilovatsaatdan artıq elektrik enerjisi istehlak edilmişdir ki, bu da ötən ilin müvafiq dövründəki istehlakdan 7,5 milyon kilovatsaata yaxın azdır. Ödəniş isə ötən ilin müvafiq dövründəki göstəricidən mütləq 7 faizə yaxın çoxdur. O cümlədən, daimi əhali istehlakçı qrupunda isə istehlak ötən ilin müvafiq dövründəki istehlakla müqayisədə 1,8 milyon kilovatsaatdan çox azalaraq 64,8 milyon kilovatsaata yaxın olmuşdur. Ödənişdə mütləq artım isə 8 faiz olmuşdur.

Mənbəyə istinadən onu da qeyd edək ki, cari ilin oktyabr ayında müəssisənin xidməti ərazisində istehlakçıların elektrik enerjisindən istifadə qaydalarına riayət etmələrinin yoxlanılması ilə bağlı keçirilmiş reydlər zamanı 68 istehlakçının sayğac uçot komplektində qüsur aşkar edilərək 344,6 min kilovatsaata yaxın itirilmiş elektrik enerjisinin 20,7 min manata yaxın istehlak dəyəri bərpa edilmişdir. Onu da qeyd etmək yerinə düşərdi ki, cari ilin 10 ərzində müəssisə üzrə 885 qayda pozuntusu aşkar edilərək 7 milyon 413,4 min kilovatsaata yaxın itirilmiş elektrik enerjisinin 444,8 min manatdan artıq istehlak dəyəri bərpa edilmişdir. Hesabat dövrü ərzində həmin bu məbləğin 78 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.