Ötürücü infrastrukturun səmərəli fəaliyyətinin təmin edilməsi elektrik enerjisinin istehlakçılara dayanıqlı şəkildə keyfiyyətlə çatdırılması üçün mühüm şərtdir. Bu məqsədlə son illərdə paylayıcı elektrik şəbəkələrində görülən işlərin həcmi xeyli genişləndirilib.

“Azərenerji” ASC-nin Mətbuat xidmətinə “Şirvan Elektrik Şəbəkəsi”ndən (EŞ) daxil olan məlumata görə, müəssisənin xidməti ərazisində qış mövsümünə hazırlıq məqsədilə bir sıra təmir işləri yerinə yetirilib. O cümlədən, cari ilin son üç ayı ərzində 6 və 0,4 kV-lik xətlərin bir kilometrə yaxın hissəsi əsaslı təmir edilmişdir. Eyni zamanda sayğac uçot komplektinə nəzarəti gücləndirmək məqsədilə yenidənqurma işləri aparılmış və 0,4 kV-lik xətt “SİP” tipli kabellə əvəz edilmişdir. Bundan əlavə “smart” tipli kart sayğaclarının quraşdırılması üçün sayğacların girişinə ümumilikdə 1,6 kilometrə yaxın uzunluğunda koaksial kabel çəkilmişdir.

Qeyd edək ki, yenidənqurma işləri çərçivəsində və təmir qrafikinə uyğun olaraq sözügedən dövrdə 250 kVA gücündə bir transformator məntəqəsi quraşdırılaraq istismara verilmiş və müxtəlif gücdə dörd transformator da təmir edilərək təkrar şəbəkəyə qoşulmuşdur.

Mənbənin bildirdiyinə görə, burada cari ilin oktyabr ayında keçirilmiş reydlər zamanı 10 istehlakçının elektrik enerjisindən istifadə qaydalarını pozması faktı aşkar edilərək, 25,3 min kilovatsaata yaxın itirilmiş elektrik enerjisinin 1,5 min manatdan artıq istehlak dəyəri bərpa edilmişdir. Onu da qeyd edək ki, cari ilin 10 ayı ərzində isə 40 qayda pozuntusu aşkar edilmiş, 1 milyon 809,8 min kilovatsaata yaxın itirilmiş elektrik enerjisinin 108,6 min manata yaxın istehlak dəyəri bərpa edilmiş və onun 24 faizə yaxın hissəsinin ödənişi hesabat dövründə təmin edilmiş, qalan hissənin ödənilməsi istiqamətində isə müvafiq tədbirlər həyata keçirilir.

Mənbədən əldə edilən digər bir məlumata görə, cari ilin oktyabr ayında müəssisə üzrə ümumilikdə 26,2 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 65 min kilovatsaat azdır. Ümumi ödəniş isə ötən ilin eyni dövrü ilə müqayisədə mütləq 10 faizə yaxın artmışdır. O cümlədən, daimi əhali istehlakçı qrupu tərəfindən istehlak 2,7 milyon kilovatsaatdan artıq olmuşdur ki, bu da ötən ilin eyni dövründəki istehlakdan 174 min kilovatsaat çoxdur. Ödəniş isə ötən ilin eyni dövründəki göstəricidən mütləq 17 faizə yaxın çoxdur. Cari ilin 10 ayı ərzində isə ümumi istehlak 276 milyon kilovatsaata yaxın olmuşdur. Nəticədə ötən ilin müvafiq dövrü ilə müqayisədə istehlak 11,1 milyon kilovatsaata yaxın azalmış, ödəniş isə 28 faizə yaxın mütləq  artmışdır. O cümlədən, daimi əhali istehlakçı qrupu tərəfindən istehlak ötən ilin müvafiq dövrü ilə müqayisədə 2 milyon kilovatsaata yaxın azalaraq 34,5 milyon kilovatsaatdan artıq olmuşdur.

Sonda onu da qeyd edək ki, həyata keçirilən təmir-bərpa işləri nəinki istismar səviyyəsinin daha da yüksəldilməsinə, eyni zamanda enerji haqlarının ödənilməsində də mühüm rol oynayır.