Ən müasir texnologiyaların tətbiqi ilə tikilərək istifadəyə verilmiş generasiya mənbələrindən biri olan “Şahdağ” elektrik stansiyasından “Azərenerji” ASC-nin Mətbuat xidmətinə daxil olan məlumata görə,  aqreqatlara nəzərdə tutulmuş bütün texniki xidmətlər qrafikə uyğun olaraq vaxtında göstərilmiş və bunun nəticəsində də plansız boş dayanmalara yol verilməmişdir. Məhz bunun  nəticəsidir ki, ötən illərdə olduğu kimi, cari ilin ötən 11 ayında da elektrik enerjisi istehsalında problem yaranmamışdır. Hazırda stansiya dispetçer qrafikinə uyğun fəaliyyət göstərir.

Mənbənin bildirdiyinə görə, stansiyada cari ilin noyabr ayında 24,6 milyon kilovatsaata yaxın elektrik enerjisi istehsal eidlmişdir. Qeyd edək ki, cari ilin 11 ayı ərzində isə burada 264,2 milyon kilovatsaata yaxın elektrik enerjisi istehsal edilmişdir.

Avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsi və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində elektrik stansiyasının digər texniki iqtisadi göstəriciləri də qənaətbəxşdir.

“Digər enerji müəssisələrində olduğu kimi, burada da 2013/2014-cü illərin payız-qış mövsümünü normal keçirmək məqsədilə tədbirlər planına uyğun olaraq enerji bloklarında müxtəlif təyinatlı təmir işləri aparılmışdır. Eyni zamanda digər elektrik avadanlıqlarında da profilaktik təmir işləri icra edilmişdir”, – deyən mənbə cari ilın son üç ayı ərzində həyata keçirilmiş işlər barəsində də məlumat verdi. Mənbənin bildirdiyinə görə, sözügedən dövrdə maşın zalının inzibati binasında təmir işləri həyata keçirilmiş və yeraltı drenaj boruları təmizlənmişdir. Sözügedən dövr ərzində doqquz porşen tipli aqreqata da növbəti istismar həddinə uyğun olaraq texniki qulluq göstərilmişdir. Yei gəlmişkən, tələbatçıların keyfiyyətli və dayanıqlı elektrik enerjisi ilə təmin edilməsi  məqsədilə  təmir və aqreqatlarda aparılan texniki xidmət işləri stansiyanın təmir briqadası tərəfindən aparılır.

Onu da qeyd edək ki,  yanğın təhlükəsizliyi məsələsi də daima diqqət mərkəzində saxlanılır. Belə ki, yanğınsöndürmə vasitələrinə, yanğına qarşı su təchizatına növbədənkənar baxış keçirilmişdir.

Xatırladaq ki, “Şahdağ” elektrik stansiyası hər birinin gücü 8,7 MVt olan 12 ədəd porşen tipli aqreqatdan ibarətdir. Bu stansiyanın “Qış İdman Kompleksi”nin elektrik enerjisi təchizatının təmin edilməsində və həmçinin Quba və Qusar rayonlarının enerji təhlükəsizliyinin daha da möhkəmləndirilməsində, enerjinin ötürülməsi və paylaşdırılması sistemlərinin təhlükəsizliyinin təmin edilməsində böyük rolu vardır.