Respublika ərazisində fəaliyyət göstərən   enerji obyektlərində həyata keçirilən təmir-bərpa işləri onu deməyə imkan verir ki, fövqəladə hallar istisna olmaqla,  qış mövsümündə istehlakçılar elektrik enerjisindən istifadə zamanı problemlə  qarşılaşmayacaqlar. Ölkənin gözəl guşələrindən biri hesab edilən Oğuz rayonunun enerji təchizatında müstəsna rolu olan eyni adlı elektrik şəbəkəsi də bu qəbildən olan ərazi vahidlərindəndir ki, burada yaşayan əhalinin elektrik enerjisi ilə dayanıqlı təminatı həmişə gündəmdə olub.

“Oğuz Elektrik Şəbəkəsi”ndən “Azərenerji” ASC-nin Mətbuat xitmətinə daxil olan məlumata görə, rayon və onun ətraf zonalarını qidalandıran elektrik verilişi xətləri (EVX) və tranformator məntəqələri müntəzəm olaraq yoxlanılır və lazımi tədbirlər yerinə yetirilir.

Məsələn, cari ilin son üç ayı ərzində 10 kV-lik “Xaçmaz”, “Bayan”, “Yaqublu”, “Sincan” elektrik verilişi xətlərində həyata keçirilmiş müxtəlif təyinatlı təmir işləri zamanı 3,5 km-dən artıq xəttin dayanıqlığı daha da möhkəmləndirilmişdir. Eyni zamanda müəssisənin xidməti ərazisində olan 0,4 kV-lik xətlərin də 1,5 km-dən artıq hissəsi təmir edilmişdir. Bütün bunlarla yanaşı dayaqlararası naqillər tarımlanmış, əyilmiş dayaqlar bərpa edilmişdir. Bundan əlavə, təmir qrafikinə uyğun olaraq 6 tranfirmator məntəqəsində əsaslı və cari təmir işləri yerinə yetirilmişdir.

Mənbəyə istinadən qeyd edək ki, cari ilin oktyabr ayında müəssisənin xidmət ərazisində 5,9 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövründəki istehlakdan 322 min kilovatsaat çoxdur. Ödəniş isə ötən ilin müvafiq dövrü ilə müqayisədə mütləq 12 faizdən çox artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 283 min kilovatsaat azalaraq 882 min kilovatsaatdan artıq olmuş, ödəniş isə ötən ilin müvafiq dövrü ilə müqayisədə mütləq 19 faizə yaxın artmışdır. Yeri gəlmişkən, cari ilin 10 ay ərzində müəssisə üzrə elektrik enerjisi istehlakı 56,9 milyon  kilovatsaata yaxın olmuşdur ki, bu da ötən ilin eyni dövründəki göstəricidən 4.5 milyon kilovatsaat çoxdur. Ötən ilin müvafiq dövrü ilə müqayisədə ödəniş isə 6 faizdən çox mütləq artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 106 min kilovatsaata yaxın azalaraq 9,5 milyon kilovatsaata yaxın olmuş, ödəniş 12 faizə yaxın mütləq artmışdır.

Əldə etdiyimiz digər bir məlumata görə isə, elektrik enerjisindən istifadə zamanı qaydaların pozulmasının qarşısının alınması istiqamətində də xeyli işlər görülmüş və bu istiqamətdə tədbirlər davam etdirilir. Reydlər zamanı sayğacların dövlət möhürlərinin zədələnməsi, müdaxilə edilən sayğaclardan keçən enerjinin bir hissəsinin qeydə alınmaması, sayğacdan kənar xətdən istifadə və digər qüsurlar aşkar olunur. Həmin istehlakçılara qarşı daha sərt tədbirlər görülür. Mənbəyə istinadən onu da qeyd etmək yerinə düşərdi ki, cari ilin 10 ayı ərzində müəssisənin xidməti ərazisində keçirilmiş reydlər zamanı 60-a yaxın istehlakçının sayğac uçot komplektində pozuntu faktı aşkar edilərək 349,2 min kilovatsaata yaxın itirilmiş elektrik enerjisinin 19,2 min manata yaxın istehlak dəyəri bərpa edilmiş, onun 73 faizə yaxın hissəsinin ödənişi hesabat dövründə təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.