İstehlakçıların elektrik enerjisi təchizatında yaranacaq hər hansı bir problemin qarşısının vaxtında alınması məqsədilə  digər enerji obyektlərində olduğu kimi Şəki, Zaqatala, Balakən, Qax, Oğuz, İsmayıllı və Qəbələ elektrik şəbəkə rayonlarında da ənənəvi olaraq yarımstansiya və elektrik verilişi xətlərində  təmir-bərpa və yenidənqurma işləri həyata keçirilir.

Sözügedən elektrik şəbəkələrini əlaqələndirən “Şəki Regional Elektrik Şəbəkəsi”ndən “Azərenerji” ASC-nin Mətbuat xidmətinə  daxil olan məlumata görə, müəssisənin balans mənsubiyyətinə aid olan 35 kilovoltluq və ondan yuxarı gərginlikli EVX-lərdə cari ilin son üç ayı ərzində həyata keçirilmiş müxtəlif təyinatlı təmir işləri zamanı naqillər təmir edilmiş və yanisi ilə əvəzlənmiş, izolyatorlar dəyişdirlmişdir. Buna misal olaraq 110 kV-lik I-IV “Şəki”, I-II “Zaqatala”, “İsmayıllı”, “Əyriçay”, 35 kV-lik “Çeşməli”, “Oğuz”, “Qapəçay” və digər bir neçə hava xətlərində (HX) görülmüş işləri göstərmək olar.

Qeyd edək ki, sözügedən dövrdə texniki göstəricilərin daha da yaxşılaşdırılması məqsədilə müəssisənin balans mənsubiyyətinə aid olan 110 kV-lik “İpək Kombinatı” və “Əyriçay” yarımstansiyalarının hər birində 16 MVA transformator təmir edilmişdir.  Eyni zamanda 110 kV-lik “Şəki”, “Cəfərabad”, “Zaqatala” yarımstansiyalarında və onun yardımçı avadanlıqlarında əsaslı və cari təmir işləri yerinə yetirilmişdir. Təmir-bərpa işlərinə yağ və vakuum açarlarının, ayrıcıların əsaslı təmiri, yarımstansiyanın torpaqlanma konturunun bərpası və digər işlər daxildir.

Mənbədən əldə etdiyimiz digər bir məlumata görə isə, müəssisənin balans mənsubiyyətinə aid olan 35 kV-lik “Oğuz”, “Taxılçılıq” və digər yarımstansiyalarda həyata keçirilmiş oxşar təmir işləri ilə paralel olaraq ümumi gücü 6,5 MVA olan 2 ədəd transformatorda təmir edilmişdir.

“Bunlardan əlavə, xətlərdə baş verən enerji itkisinin qarşısının alınması məqsədilə də müəyyən tədbirlər həyata keçirilmişdir”, – deyən mənbə yanğın təhlükəsizliyi tədbirləri barəsində də məlumat verdi və bildirdi ki, yanğın təhlükəsizliyi tədbirləri daha da gücləndirilmişdir. Belə ki, EVX-lərin mühafizə zonaları və yarımstansiyaların əraziləri quru otlardan, yağ tutumlu avadanlıqların ətrafı çirkli yağ örtüyündən təmizlənmişdir. Eyni zamanda mühafizə avadanlıqlarının nəzarət və ölçü cihazları təftiş edilmiş və aşkar edilmiş qüsurlar aradan qaldırılmışdır.

Mənbə cari ildə nəzərdə tutulmuş digər təmir işləri barəsində onu da bildirdi ki, 110 kV-lik I-II “Şəki”, II “Zaqatala” və digər bir neçə EVX-lərdə əsaslı təmir işlərinin aparılmasına başlanılacaqdır. Eyni zamanda 110 kV-lik “Balakən” və 35 kV-lik “Qabaqçöl” yarımstansiyalarında da müxtəlif təyinatlı əsaslı təmir işlərinin həyata keçirilməsi nəzərdə tutulmuşdur.

Mənbədən daxil olan məlumata görə, fövqəladə hallar nəzərə alınmazsa, müəssisə avadanlıqların texniki göstəriciləri  baxımından  iqlim şəraitinə tam hazırdır.

Yeri gəlmişkən, icrası reallaşdırılan tədbirlər enerji ötürücülərində dayanıqlığın  yüksək səviyyədə təmin edilməsinə geniş imkanlar açır.