İmişli rayonunun elektrik enerjisi təchizatının dayanıqlılığı daha da möhkəmləndirilmişdir. Rayon elektrik şəbəkəsinin kollektivi bu sahədə üzərinə düşən vəzifələri layiqincə yerinə yetirirlər.

Şəbəkənin istismar səviyyəsinin yüksəldilməsi məqsədilə görülən tədbirlər barədə “İmişli” EŞ-dən “Azərenerji” ASC-nin Mətbuat xidmətinə daxil olan məlumata görə,  yarımstansiyalarda avadanlıqlara texniki baxış həyata keçirilib. Müxtəlif gücə malik transformatorlar cari və əsaslı təmirdən çıxarılıb.

Qeyd edək ki, rayon mərkəzi və kəndlərdə enerji təsərrüfatının qış mövsümünə hazırlanması üçün məqsədyönlü tədbirlər əsasən başa çatdırılmışdır. O cümlədən, qışa hazırlıqla əlaqədar xətlər yaşıl kütlədən təmizlənmiş, məftillər dartılmış, transformatorlara baxış keçirilmişdir.

Onu da qeyd edək ki, həyata keçirilən işlər istehlak edilmiş enerji haqlarının ödənişinə də müsbət təsir göstərir. Belə ki, müəssisə üzrə cari ilin oktyabr ayında ümumilikdə 14,9 milyon kilovatsaatdan artıq elektrik enerjisi istehlak edilmişdir. Bu da ötən ilin müvafiq dövründəki istehlakla müqayisədə 1,9 milyon kilovatsaat çoxdur. İstehlak edilmiş elektrik enerjisinin ödənişi isə ötən ilin müvafiq dövründəki göstərici ilə müqayisədə mütləq 16 faizdən çox artmışdır.  O cümlədən, daimi əhali istehlakçı qrupunda istehlak ötən ilin müvafiq dövrü ilə müqayisədə 1,4 milyon kilovatsaata yaxın artaraq 4.3 milyon kilovatsaatdan artıq olmuşdur. Ötən ilin müvafiq dövrü ilə müqayisədə ödənişdə mütləq artım isə 42 faizdən çox olmuşdur. Onu da qeyd etmək yerinə düşərdi ki, cari ilin 10 ayı ərzində ümumilikdə 165,4 milyon kilovatsaatdan artıq elektrik enerjisi istehlak edilmişdir ki, bu da ötən ilin müvafiq dövründəki istehlakdan 5 faizə yaxın çoxdur. Ödəniş isə ötən ilin müvafiq dövründəki göstəricidən mütləq 3 faizə yaxın çoxdur. O cümlədən, daimi əhali istehlakçı qrupunda istehlak ötən ilin müvafiq dövründəki istehlakla müqayisədə 8 milyon kilovatsaatdan çox artaraq 47 milyon kilovatsaatdan artıq olmuşdur.

“Digər EŞ-lərdə olduğu “İmişli” EŞ-in əməkdaşları tərəfindən də elektrik enerjisindən qeyri qanuni istifadə hallarının qarşısı vaxtında alınır və həmin istehlakçılar barəsində müvafiq tədbirlər görülür”, – deyən mənbə onu da bildirdi ki, cari ilin oktyabr ayında müəssisənin xidməti ərazisində keçirilmiş reydlər zamanı 770-ə yaxın istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 1 milyon 934,9 min  kilovatsaatdan artıq itirilmiş elektrik enerjisinin 116,1 min manata yaxın istehlak dəyəri bərpa edilmişdir. Sonda onu da qeyd edək ki, cari ilin 10 ayı ərzində isə 1910-a yaxın qayda pozuntusu aşkar edilərək akt tərtib olunmuş, 5 milyon 541,8 min kilovatsaatdan artıq itirilmiş elektrik enerjisinin 332,5 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 20 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.