İstehlakçıların keyfiyyətli və dayanıqlı elektrik enerjisi ilə təmin edilməsi istiqamətində ölkə ərazisində fəaliyyət göstərən enerji təsərrüfatlarında ənənəvi təmir-bərpa işləri yerinə yetirilir.

“Şəki Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumata görə, müəssisənin xidməti ərazisində qış mövsümünə hazırlıq məqsədilə bir sıra təmir işləri yerinə yetirilib. O cümlədən, 50 transformator məntəqəsində (TM) müxtəlif təyinatlı təmir işləri həyata keçirilmişdir.

Qeyd edək ki, 10, 6 və 0,4 kV-lik hava elektrik verilişi xətlərində də əsaslı və cari təmir işləri aparılmış, istismara yararsız naqillər yeniləri ilə əvəz edilmişdir. Nəticədə 10 kV-lik “Aydınbulaq”, “Suçma”, “Sənaye”, 6 kV-lik II,  IV, VIII “Şəhər” və digər bir neçə xəttin ümumilikdə 32,5 kilometrdən artıq hissəsi təmir edilmişdi. Eyni zamanda, Şəki şəhəri, Cəfərabad, Qayabaşı, Çeşməli və digər kəndlərdə də 0,4 kV-lik xətlərin 33,4 kilometrə yaxını təmir edilmişdir. Yeri gəlmişkən, növbəti mövsümün uğurla başa çatdırılması istiqamətində enerji təchizatçıları öhdələrinə düşən vəzifələri layiqincə yerinə yetirməyə çalışırlar.

Mənbə onu da bildirdi ki, cari ilin oktyabr ayında müəssisənin xidmət ərazisində 11,2 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövründəki istehlakdan 1,6 milyon kilovatsaata yaxın çoxdur. Ödəniş isə ötən ilin müvafiq dövründəki göstəricidən mütləq 21 faizə yaxın çoxdur. O cümlədən, daimi əhali istehlakçı qrupu tərəfindən istehlak ötən ilin müvafiq dövrü ilə müqayisədə 844 min kilovatsaat artaraq 6,4 milyon kilovatsaata yaxın olmuşdur. Ödənişdə mütləq artım isə 12 faizdən artıq olmuşdur. Onu da qeyd edək ki, cari ilin 10 ayı ərzində müəssisə üzrə istehlak ötən ilin müvafiq dövrü ilə müqayisədə 7,4 milyon kilovatsaat artaraq  107,6 milyon kilovatsaata yaxın olmuşdur. Ödəniş isə ötən ilin müvafiq dövrü ilə müqayisədə mütləq 12 faiz artmışdır. O cümlədən, daimi əhali istehlakçı qrupunda isə bu göstəricilər müvariq olaraq 3,8 milyon kilovatsaata yaxın,  55,7 milyon kilovatsaatdan artıq və  8 faizə yaxın olmuşdur.

Mənbə onu da bildirdi ki, cari ilin oktyabr ayında müəssisənin xidməti ərazisində keçirilmiş reydlər zamanı 140-dan artıq istehlakçının sayğac uçot komplektində pozuntu faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış, 137,1 min  kilovatsaatdan artıq itirilmiş elektrik enerjisinin 8,2 min manatdan çox istehlak dəyəri bərpa edilmişdir. Onu da qeyd etmək yerinə düşərdi ki,  cari ilin 10 ayı ərzində sözügedən qayda pozuntusuna görə müəssisənin xidməti ərazisində 850 qüsur aktı tərtib olunmuş, 2 milyon 105,7 min kilovatsaatdan artıq itirilmiş elektrik enerjisinin 126,3 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 77 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.