Respublikamızın şimal bölgəsinin elektrik enerjisi təchizatında xüsusi yeri olan “Xaçmaz Elektrik Stansiyası” payız-qış mövsü­mü­nə hazırdır. Buradakı mühərrik-generatorların və digər köməkçi avadanlıqların texniki vəziyyəti daim nəzarətdə saxlanılır. Son aylar ərzində burada görülən işlər haqqında məlumat verən mənbə bildirdi ki, 5 mühərrik-generatorda növbəti istismar həddinə uyğun texniki qulluq işləri aparılıb.

Stansiyadan bu barədə “Azərenerji” ASC-nin Mətbuat xidmətinə məlumat verərkən bildirdilər ki, qeyd olunan mühərrik-generatorlarda növbəti istismar həddinə uyğun ­aparılan texniki qulluq işləri zamanı mühərrikdə yağ və qaz süzgəcləri təmizlənib. Qaz paylayıcı qur­ğuda da müxtəlif təyinatlı təmir işləri aparılıb. Qeyd edək ki, 110 kilovoltluq 25 MVA gücündə transformatorlarda da təmir işləri aparılıb.

İstehsalat və xidmət binalarında yanğın təhlükəsizliyinin vəziy­yətinə baxış keçirilib, yanğın təhlükəsizliyini təmin etmək üçün müvafiq qaydalara uyğun olaraq tədbirlər planı tətbiq edilib. Əlavə olaraq, yanğınsöndürmə su sistemində boruların istilik izolyasiyası yoxlanılıb, yararsız kran və şlanq­lar dəyişdirilib.

Yeri gəlmişkən, stansiya üzrə texniki-iqtisadi göstəricilər də qənaətbəxşdir. Belə ki, cari ilin 10 ayı ərzində stansiyada 215,6 milyon kilovat-saata yaxın, təkcə oktyabr ayında isə 21 milyon 781 min kilovat-saat elektrik enerjisi istehsal edilib.

Bununla yanaşı, stansiyanın işinin daha da təkmilləşdirilməsi məqsədilə əlavə tədbirlər görülür. Mühərrik-generatorlardakı əsas qaz klapanları istehsalçı şirkət tərəfindən təkmilləşdirilib. Noyab­rın 25-də 1 aqreqatda 20 ədəd klapan dəyişdirilib. Bu texniki tədbirin elektrik enerjisi istehsalında yanacaq sərfiyatına müəyyən qədər qənaət etməyə imkan yaradacağı gözlənilir.