Qış  fəslinin gəlişi ilə bağlı ölkənin qərb bölgəsinin enerji təsərrüfatının dayanıqlığını daha da keyfiyyətlə  təmin etmək məqsədilə aparılan təmir-bərpa işləri uğurla başa çatdırılmışdır. “Gəncə Regional Elektrik Şəbəkəsi"ndən  (REŞ) “Azərenerji” ASC-nin Mətbuat xidmətinə daxil olan məlumatda bu barədə qeyd edilir.

Mənbənin bildirdiyinə görə cari ilin 10 ayı ərzində “Gəncə” elektrik şəbəkəsi üzrə 6-10 kV-lik EVX-lərdə aparılan yenidənqurma və əsaslı təmir işləri zamanı xətlərin 54 kilometrdən (km) artıq hissəsi yeraltı kabel xəttinə keçirilmişdir. Eyni zamanda sözügedən xətlərin 2 km-ə yaxın hissəsi isə cari təmir edilmişdir. Yenidənqurma işlərinə 1530-a yaxın smart-katr tipli sayğacların quraşdırlıması da daxildir. Eyni zamanda burada 24 kilometrə yaxın 0,4 kV-lik SİP kabel çəkilmiş, 960-a yaxın elektrik dayağı basdırılmışdır. Qeyd edək ki, sözügedən dövrdə müəssisənin balans mənsubiyyətinə aid olan TM-lərin 170-də müxtəlif təyinatlı təmir işləri həyata keçirilmiş və avadanlıqlar normal iş rejiminə gətirilmişdir.   Eyni zamanda müxtəlif gücdə 4 transformator da təmir edilərək istehlakçıların istifadəsinə verilmişdir. Onu da qeyd edək ki, yenidənqurma və təmir işləri ilə yanaşı xətlərə mane olan yaşıl kütlə təmizlənmiş, TM və KTM-lərdə avadanlıqlar təftiş edilmiş, ərazilər quru otlardan təmizlənmişdir.

“Həyata keçirilmiş və hazırda davam etdirilən işlər paylayıcı şəbəkənin daha da səmərəli və dayanıqlı işləməsinə imkan verəcəkdir”, – deyən mənbə onu da qeyd etdi ki, cari ilin oktyabr ayında müəssisə üzrə 98,6 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövründəki istehlakla müqayisədə 1,2 milyon kilovatsaata yaxın çoxdur.  O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 2,8 milyon kilovatsaata yaxın artaraq, 13,2 milyon kilovatsaata yaxın olmuşdur. Ödəniş isə ötən ilin eyni dövründəki göstəricidən mütləq 23,2 faiz çoxdur. Mənbə onu da bildirdi ki, cari ilin 10 ayı ərzində isə ümumi istehlak ötən ilin müvafiq dövründəki istehlakla müqayisədə 21,3 milyon kilovatsaatdan çox azalaraq 970,3 milyon kilovatsaata yaxın olmuşdur. Ötən ilin müvafiq dövrünə nisbətən cari ilin 10 ayı ərzində istehlak edilmiş elektrik enerjisinə  görə ümumi ödəniş mütləq 11 faizdən çox artmışdır. O cümlədən, daimi əhali istehlakçı qrupunda isə istehlak 113,6 milyon kilovatsaata yaxın olmuşdur ki, bu da ötən ilin müvafiq dövründəki istehlakdan 7,7 milyon kilovatsaata yaxın çoxdur. Ödənişdə mütləq artım isə 6 faizdən artıqdır.

Mənbədən əldə edilən digər bir məlumata görə, cari ilin 10 ayı ərzində müəssisənin xidməti ərazisində keçirilmiş reydlər zamanı 50-dən artıq qayda pozuntusu faktı aşkar edilərək 551,4 min kilovatsaatdan artıq itirilmiş elektrik enerjisinin 33,1 min manata yaxın istehlak dəyəri bərpa edilmişdir. Hesabat dövrü ərzində həmin bu məbləğin 70 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir. Yeri gəlmişkən, cari ilin oktyabr ayında isə istehlakçıların elektrik enerjisindən istifadə qaydalarına riayət etmələrinin yoxlanılması ilə bağlı keçirilmiş reydlər zamanı 3 istehlakçının sayğac uçot komplektində qüsur aşkar edilərək 10 min kilovatsaatdan artıq itirilmiş elektrik enerjisinin 600 manatdan çox istehlak dəyəri bərpa edilmişdir.

Onu da qeyd etmək yerinə düşərdi ki, cari ilin 10 ayı ərzində müəssisə üzrə aşkar edilmiş qayda pozuntularına görə iki istehlakçının sənədləri tədbir görülməsi üçün hüquq-mühafizə orqanlarına göndərilmişdir.

Qayda pozuntularının təsnifatı və istehlakçı qrupu barədə əldə etdiyimiz məlumata istinadən bildirək ki,  elektrik enerjisindən yenə də kənar xətt vasitəsilə istifadə edilməsi halı üstünlük təşkil etmiş və ən çox qayda pozuntusu  məişət abonenti (əhali) istehlakçı qrupunda aşkar edilmişdir.