“Sabirabad” elektrik  şəbəkəsində (EŞ) istehlakçılara xidmətin  səviyyəsinin daha da yüksəldilməsi məqsədilə paylayıcı elektrik verilişi xətlərində, transformator məntəqələrində nəzərdə tutulmuş əsaslı və cari təmir işlərinin vaxtında yerinə yetirilməsi, itkilərin azaldılması, sərf olunmuş enerjinin dəyərinin vaxtında ödənilməsi  üçün kollektiv öhdələrinə düşən işi layiqincə yerinə yetirmək üçün bütün qüvvələrini səfərbər etmişlər.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, cari ilin sentyabr ayında müəssisənin xidməti ərazisində keçirilmiş reydlər zamanı 100-dən artıq istehlakçının sayğac uçot komplektində qüsur aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 338,8 min  kilovatsaatdan artıq itirilmiş elektrik enerjisinin 20,3 min manatdan çox istehlak dəyəri bərpa edilmişdir.

Qeyd edək ki, cari ilin 9 ayı ərzində burada keçirilmiş reydlər zamanı aşkar edilmiş 1480-dan artıq qayda pozuntusuna görə 5 milyon 776,1 min kilovatsaata yaxın itirilmiş elektrik enerjisinin 346,6 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 90 faizdən çox hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Mənbəyə istinadən onu da qeyd edək ki, cari ilin son üç ayı ərzində müəssisənin xidməti ərazisində 10 kV-lik EVX-lərdən I-III “Şəhər”, “Surra”, “Xəlfəli” və digərlərində aparılan təmir işləri zamanı onları ümumilikdə 4,3 km-ə yaxın hissəsi təmir olunmuşdur. Eyni zamanda rayonun “Qalağayın”, “Rüstəmli”, “Narlıq” və digər 0,4 kV-lik xətlərin isə 5,1 km-ində təmir işləri həyata keçirilmişdir. Onu da qeyd etmək yerinə düşərdi ki, sözügedən dövrdə müəssisənin balans mənsubiyyətinə aid olan TM-lərdə müxtəlif təyinatlı təmir işləri həyata keçirilmişdir. Eyni zamanda müxtəlif gücdə 50-yə yaxın transformator da təmir edilərək təkrar şəbəkəyə qoşulmuşdur.

Mənbədən əldə edilən digər bir məlumata görə, cari ilin sentyabr ayında müəssisənin xidmət ərazisində 13.2  milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 506 min kilovatsaat azdır. O cümlədən, daimi əhali istehlakçı qrupu tərəfindən istehlak 6,2 milyon kilovatsaatdan artıq olmuşdur. Nəticədə ötən ilin eyni dövrü ilə müqayisədə istehlak 796 min kilovatsaata yaxın azalmışdır. Onu da qeyd  edək ki, cari ilin 9 ayı ərzində müəssisə üzrə istehlak ötən ilin eyni dövründəki istehlakla müqayisədə 3,1 milyon kilovatsaata yaxın artaraq 170,5 milyon kilovatsaatdan artıq olmuşdur. Ödənişdə mütləq artım isə bir faizə yaxın olmuşdur.  O cümlədən, daimi əhali istehlakçı qrupu üzrə bu göstəricilər müvafiq olaraq 283 min kilovatsaata yaxın, 98,9 milyon kilovatsaatdan artıq olmuşdur

Sonda onu da bildirək ki, növbəti mövsümün uğurla başa çatdırılması istiqamətində enerji təchizatçıları öhdələrinə düşən vəzifələri layiqincə yerinə yetirməyə çalışırlar.