İstehlakçıların dayanıqlı və keyfiyyətli elektrik enerjisi ilə təmin edilməsi, itkilərin azaldılması məqsədilə yarımstansiyalarda, ötürücü qurğularda əsaslı və cari təmir işlərinin yerinə yetirilməsi energetiklərin  ən mühüm vəzifələrindən biridir. Digər enerji obyektlərində olduğu kimi “Mingəçevir Regional Elektrik Şəbəkəsi”ndə (REŞ)  də payız-qış mövsümünə hazırlıq məqsədilə müvafiq tədbirlər həyata keçirilir. O cümlədən, tədbirlər planında nəzərdə tutulmuş işlər əsasən yerinə yetirilmiş və yanğın təhlükəsizliyi ilə bağlı bir ıra tədbirlər həyata keçirilmişdir. Şəbəkədən Mingəçevir şəhəri, Bərdə, Yevlax, Ağdaş, Tərtər, Ağdam, Ağsu, Ucar, Göyçay, Naftalan və Goranboy inzibati ərazilərində yerləşən elektrik verilişi xətlərində və yarımstansiyalarında  cari ilin  son üç ayı ərzində görülmüş cari və əsaslı təmir işləri barəsində “Azərenerji” ASC-nin Mətbuat xidmətinə daxil olan məlumatda belə deyilir.

Müəssisədən  verilən məlumata görə, sözügedən dövr ərzində balans mənsubiyyətinə aid 35 kV-lik “Kələntərli”, “Şirvanlı”, “Qərvənd”, “Yeni Həyat” və digər elektrik verilişi hava xətlərində (EVHX) müxtəlif təyinatlı təmir işləri həyata keçirilmiş, o cümlədən 8 kilometrə yaxın hissəsində əsaslı və cari təmir işləri görülmüşdür. Qeyd edək ki, bu müddət ərzində 110 kV-lik I-II “Yevlax”, “Usar”, “Bərdə-Tərtər” və digər EVX-lərin isə 5,8 kilometri təmir edilib və eyni zamanda xeyli sayda izolyator dəyişdirilib, bəzi dayaqlarda kontur torpaqlanması bərpa edilmişdir.  Mənbədən əldə etdiyimiz digər bir məlumata görə, analoji təmir işləri 220, 330 və 500 kV-lik EVX-lərdə də həyata keçirilmişdir. Ümumilikdə həmin bu xətlərin 30 km-dən artıq hissəsində müxtəlif təyinatlı təmir işləri aparılmışdır.  O cümlədən xəttin trassası yaşıl kütlədən təmizlənmişdir.

Yeri gəlmişkən, aidiyyəti yarımstansiyalar üzrə də bir sıra tədbirlər yerinə yetirilib. EŞ-in xidməti ərazisində vaxtında həyata keçirilmiş hazırlıq işləri hazırkı iqlim şəraitində elektrik enerjisinin daha da keyfiyyətli və dayanıqlı ötürülməsi üçün geniş imkan yaradıb.

Mənbənin verdiyi məlumata əsasən, sadalanan tədbirlərin yerinə yetirilməsi, enerji təsərrüfatlarının daha da dayanıqlı fəaliyyətinə zəmanət verən əsas amillərdəndir. Bunu nəzərə alaraq, Şəbəkədən yenidənqurma işlərinin davam etdirilməsinin gündəlikdə duran əsas tapşırıqlardan biri olduğu bildirildi.

Sonda onu da bildirdi ki, burada da yanğın təhlükəsizliyi tədbirləri diqqət mərkəzindədir. Belə ki, EVX-lərin mühafizə zonaları və yarımstansiyaların əraziləri quru otlardan, yağ tutumlu avadanlıqların ətrafı çirkli yağ örtüyündən təmizlənmişdir. Eyni zamanda mühafizə avadanlıqlarının nəzarət və ölçü cihazları təftiş edilmiş və aşkar edilmiş qüsurlar aradan qaldırılmışdır.