İstehlakçıların dayanıqlı və keyfiyyətli elektrik enerjisi ilə təmin edilməsi məqsədilə yarımstansiyalarda, ötürücü və paylayıcı şəbəkələrdə əsaslı və cari təmir işlərinin yerinə yetirilir. Həyata keçirilmiş məqsədyönlü tədbirlər nəticəsində itkilərin azaldılması, ümumiyyətlə müəssisə üzrə texniki iqtisadi göstəricilərdə müsbət nəticələr əldə edilmişdir.

“Azərenerji” ASC-nin Mətbuat xidmətinə “Zərdab” elektrik şəbəkəsindən (EŞ) daxil olan məlumata görə, cari ilin sentyabr ayında müəssisənin xidməti ərazisində keçirilmiş reydlər zamanı 23 istehlakçının sayğac uçot komplektində qüsur aşkar edilmişdir. Aşkar edilmiş pozuntular müvafiq qaydada aktlaşdırılmış və 185,1 min kilovatsaata yaxın itirilmiş elektrik enerjisinin 11,1 min manatdan artıq istehlak dəyəri bərpa edilmişdir. Qeyd edək ki, cari ilin 9 ayı ərzində burada 120-dən artıq qayda pozuntusu fakt aşkar olunmuşdur. Nəticədə 345,6 min kilovatsaata yaxın itirilmiş elektrik enerjisinin 20,7 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 80 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Mənbədən, cari ilin son üç ayı ərzində müəssisənin balans mənsubiyyətinə aid olan elektrik verilişi xətlərində (EVX) və transformator məntəqələrində (TM) həyata keçirilmiş təmir işləri barəsində əldə etdiyimiz məlumatda o da qeyd edilir ki, 10 kV-lik “Sovxoz”, “SMU-21”, 2 və 3 saylı “Şəhər” və digər hava xətlərində aparılan müxtəlif təyinatlı təmir işləri zamanı ümumilikdə 3,8 kilometrə yaxın xətt təmir edilmişdir. Eyni zamanda rayonun Əlçanlı, Məlikli, Pərvanlı və digər kəndlərində 0,4 kV-lik xətlərin isə 3,6 km-i təmir edilmişdir. Qeyd edək ki, təmir kampaniyası qrafikinə uyğun olaraq sözügedən dövrdə müəssisənin xidməti ərazisində balans mənsubiyyətinə aid TM-lərdə müxtəlif təyinatlı təmir işləri həyata keçirilmişdir. Eyni zamanda müxtəlif gücdə 26 transformatorda əsaslı təmir edilərək istehlakçıların istifadəsinə verilmişdir.

Mənbədən əldə etdiyimiz digər bir məlumata görə, müəssisə üzrə cari ilin sentyabr ayında ümumilikdə 3 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 506 min kilovatsaat azdır. Hesabat dövründə ümumi ödəniş ötən ilin müvafiq dövründəki göstərici ilə müqayisədə mütləq bir faizə yaxın artmışdır. O cümlədən, daimi əhali istehlakçı qrupunda isə 1,7 milyon kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 83 min kilovatsaatdan çox artmış, ödənişdə mütləq artım isə 5 faiz olmuşdur.

Yeri gəlmişkən, cari ilin 9 ayı ərzində ümumi istehlak ötən ilin müvafiq dövrü ilə müqayisədə 708 min kilovatsaata yaxın azalaraq 35,4 milyon kilovatsaata yaxın olmuşdur. Ödənişdə mütləq artım isə 4 faizdən artıq olmuşdur. O cümlədən, daimi əhali istehlakçı qrupunda istehlak 15,1 milyon kilovatsaata yaxın olmuşdur. Nəticədə ötən ilin müvafiq dövrü ilə müqayisədə istehlak 584 min kilovatsaata yaxın artmış, ödənişdə mütləq artım 9 faizə yaxın olmuşdur.

Onu da qeyd etmək yerinə düşərdi ki, burada yanğın təhlükəsizliyinin təmin edilməsini nəzərdə tutulan tədbirlər həyata keçirilir. O cümlədən, artıq yağ tutumlu avadanlıqlarda yanğın təhlükəsizliyi təmin edilib, EVX-lərin mühafizə zonalarının və TM-lərin ərazilərinin quru otlardan və kənar əşyalardan, transformatorların özülü və gövdəsi çirkli yağ örtüyündən təmizlənib.