Şəbəkənin istismar vəziyyətinin yaxşılaşdırılması üçün zəruri tədbirlər görülür. Vaxtında aparılan cari və əsaslı təmir işləri nəticəsində qəza açılmaları minimum həddə düşüb, istehlakçılar daha da dayanıqlı elektrik enerjisi ilə təmin olunurlar. Həyata keçirilən məqsədyönlü tədbirlər müəssisənin digər texniki-iqtisadi göstəricilərinə də müsbət təsir göstərir.

“Füzuli Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumatda belə qeyd edilir və o da bildirilir ki, cari ilin son üç ayında müəssisənin xidməti ərazisində 6 kV-lik “Hospital”, 10 kV-lik “Zərgər Dilağarda”, “Alxanlı”, “Şükürbəyli” və digər xətlərin ümumilikdə 3 km-dən artıq hissəsi təmir edilmiş, xeyli sayda dayaq düzləndirilmiş, naqillərin qabariti bərpa olunmuş və trassası yaşıl kütlədən təmişlənmişdir. Eyni zamanda Qayıdış və Örənqala qəsəbələrində, Əhmədbəyli, Böyük Bəhmənli və digər kəndlərin 0,4 kV-lik xətlərində həyata keçirilən təmir işləri zamanı 4 km-ə yaxın xətt təmir olunmuş, xeyli sayda izolyator və dayaq dəyişdirilmişdir. Qeyd edək ki, təmir kampaniyası çərçivəsində müxtəlif gücdə 45-ə yaxın transformatorda müxtəlif təyinatlı təmir işləri həyata keçirilmiş və normal iş rejiminə gətirilmişdir.

“Görülmüş işlər öz növbəsində sayğac sxemlərinə müdaxilə hallarının qarşısının alınmasında əhəmiyyətli rol oynayır”, – deyən mənbə onu da bildirdi ki, cari ilin sentyabr ayında müəssisənin xidməti ərazisində keçirilmiş reydlər zamanı 6 istehlakçının sayğac uçot komplektində qüsur aşkar edilərək 13,5 min kilovatsaat itirilmiş elektrik enerjisinin 810 manat istehlak dəyəri bərpa edilmişdir. Onu da qeyd etmək yerinə düşərdi ki, cari ilin 9 ayı ərzində isə burada 160 qayda pozuntusu faktı aşkar olunmuş, tərtib edilmiş aktlar müvafiq qaydada  araşdırılaraq hesabat aparılmış və nəticədə 1 milyon 8,7 min kilovatsaata yaxın itirilmiş elektrik enerjisinin 60,5 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 90 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Mənbədən əldə etdiyimiz digər bir məlumata görə, müəssisə üzrə cari ilin sentyabr ayında ümumilikdə 9,9 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 936 min kilovatsaat çoxdur. Hesabat dövründə ümumi ödəniş isə ötən ilin müvafiq dövründəki göstərici ilə müqayisədə mütləq 4 faizdən çox artmışdır. Yeri gəlmişkən, cari ilin 9 ayı ərzində isə ümumi istehlak ötən ilin müvafiq dövrü ilə müqayisədə 9,2 milyon kilovatsaata yaxın artaraq 144,6 milyon kilovatsaatdan artıq olmuşdur. Ödənişdə mütləq artım isə 4 faizə yaxın olmuşdur.