“İstehlakçıların elektrik enerjisinə olan tələbatını tam və keyfiyyətli şəkildə ödəmək məqsədilə elektrik şəbəkəsi  müəssisələrində mühüm addımlar atılır. Əməkdaşlarımız həmişə olduğu kimi, bundan sonra da  istehlakçılara göstərilən  xidmətin keyfiyyətinin daha da yüksəldilməsi, texnoloji itkilərin müəyyən olunmuş həddə saxlanması, kommersiya itkilərinin qarşısının alınması istiqamətində tədbirləri davam etdirəcəklər”.

Bu barədə “Lerik EŞ”dən “Azərenerji” ASC-nin Mətbuat xidmətinə daxil olan məlumatda  bildirilir. Son üç ayda şəbəkənin dayanıqlığının daha da möhkəmləndirilməsi, o cümlədən qış mövsümünə hazırlıq çərçivəsində mühüm addımlar atılmışdır. Belə ki, smartkart tipli sayğacların quraşdırılması məqsədilə 150 metrdən artıq koaksial kabel xətti çəkilmiş,  10 kV-lik xətlərin 7 km-ə yaxın hissəsində, 0,4 kV-lik xətlərin isə 2,3 km-də müxtəlif təyinatlı təmir işləri aparılmışdır. Qeyd edək ki, sözügedən dövrdə 13 TM-də müxtəlif təyinatlı təmir işləri reallaşdırılmışdır. Bundan əlavə 2 transformator isə təmir edilərək istehlakçıların xidmətinə verilmişdir. Mənbədən əldə etdiyimiz digər bir məlumata görə, şəbəkə üzrə yanğından mühafizə tədbirləri də daim diqqət mərkəzindədir. Yanğın təhlükəsizliyinin təmin edilməsi məqsədilə TM-lərin ərazisi quru otlardan təmizlənmiş və digər qabaqlayıcı tədbirlər görülmüşdür.

“Elektrik enerjisindən yenə də kənar xətt vasitəsilə istifadə edilməsi halı üstünlük təşkil etmiş və ən çox qayda pozuntusu  məişət abonenti (əhali) istehlakçı qrupunda aşkar edilmişdir”, – deyən mənbə onu da bildirdi ki, müəssisənin xidməti ərazisində cari ilin sentyabr ayında keçirilmiş reydlər zamanı 2 istehlakçının  sayğac uçot komplektində qüsur aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 9,7 min kilovatsaatdan artıq itirilmiş elektrik enerjisinin 580 manatdan artıq istehlak dəyəri bərpa edilmişdir. Mənbəyə istinadən onu da qeyd edək ki, cari ilin 9 ayı ərzində keçirilmiş reydlər zamanı 25 qayda pozuntusu fakt aşkar olunmuşdur. Nəticədə 93,3 min kilovatsaatdan artıq itirilmiş elektrik enerjisinin 5,6 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 66 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Cari ilin sentyabr ayında müəssisə üzrə 1,6 milyon kilovatsaatdan artıq elektrik enerjisi istehlak edilmişdir. Bu da ötən ilin müvafiq dövrü ilə müqayisədə 34 min kilovatsaat azdır. Ötən ilin müvafiq dövrü ilə müqayisədə ödəniş mütləq 12 faizə yaxın artmışdır. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 295 min kilovatsaata yaxın azalaraq 975 min kilovatsaatdan çox olmuşdur. Onu da qeyd edək ki, cari ilin 9 ayı ərzində müəssisə üzrə istehlak ötən ilin müvafiq dövrü ilə müqayisədə 40 min kilovatsaata yaxın artaraq 13,9 milyon kilovatsaatdan artıq olmuşdur. Ödəniş isə ötən ilin müvafiq dövrü ilə müqayisədə mütləq 12  faizə yaxın artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 1,3 milyon kilovatsaata yaxın azalaraq 8,7 milyon kilovatsaata yaxın olmuşdur. Ödənişdə mütləq artım isə bir faiz olmuşdur.

Sonda qeyd edək ki, dayanıqlığın müntəzəm olaraq təmin edilməsi məqsədilə ənənəvi təmir-bərpa işləri davam etdirilir.