Enerjisistemin ən qocaman generasiya güclərindən olan “Bakı İstilik Elektrik Mərkəzi”ndə payız-qış mövsümünə hazırlıq tədbirləri uğurla icra olunmaqdadır. Stansiyadan cari ilin əvvəlindən bəri görülən işlərlə bağlı “Azərenerji” ASC-nin Mətbuat xidmətinə daxil olan məlumatda ümumilikdə iş qrafikinin kifayət qədər gərgin olması diqqəti cəlb edir. Bura həm istismar səviyyəsinin daha da yaxşılaşdırılması məqsədilə aparılan məqsədyönlü işlər, həm də cari tədbirlər daxildir.

Mənbənin bildirdiyinə görə, cari ilin sentyabr ayı ərzində stansiyada 43,8 milyon kilovat-saatdan çox elektrik enerjisi istehsal olunub. İstilik enerjisinin buraxılışı isə 10 min 516 hekakalori təşkil edib. 9 ay ərzində isə bu rəqəm müvafiq olaraq 366,6 milyon kilovat-saatdan çox və 196 min 101 he­kakalori olub.

Stansiya üzrə cari ilin üçüncü rübü ərzində görülən işlər haqqında əldə etdiyimiz məlumatda bildirildi ki, iyulun əvvəllərində 1 saylı qaz turbin qurğusu (QTQ-1) əsaslı təmirə çıxarılıb. Təmir çərçivəsində genişmiqyaslı tədbirlər icra olunub. Görülən işlərə nümunə olaraq generator tərəfində 2 ədəd ventilyator, bir neçə panel, ayaqaltılar, yastıqlarda hissələr, turbində isə mis kəmərləri və mufta qapaqları və s. yenilənməsini göstərmək olar. Sistemli şəkildə “Azenco” ASC-nin mütəxəssisləri və İEM-in əməkdaşları tərəfindən reallaşdırılan tədbirlər zamanı turbin tərəfdə yastıq örtük­ləri, istilik xətləri, izolyasiya hissələri də daxil olmaqla orta halqaları yenidən yığılıb.

Ümumilikdə hər iki qaz-turbin qurğusunda xeyli işlər görülüb. Qeyd olunanlarla paralel olaraq yarımstansiya hissəsində, o cümlədən transformatorlarda da müəyyən işlər görülüb. Belə ki, 6/35/110 kilovoltluq transformatorların 6-35 kV-lik yağ açarlarının və 6/0,4 kV-lik transformatorların cari təmir işləri həyata keçirilib.

Qeyd edək ki, reallaşdırılan tədbirlərin icrası zamanı əməyin mühafizəsi və texniki təhlükəsizlik qaydalarına da ciddi əməl olunub.